შს სამინისტრო განცხადებას ავრცელებს გაერთიანებული ოპოზიციის მხარდამჭერის დავით კირკიტაძის დაკავების შესახებ და აცხადებს, რომ არ არის გამორიცხული ბრალდებულთა წრე გაფართოვდეს: „16 დეკემბერს, აქციის მონაწილეთა ძალადობრივი ქმედებებით, მძიმედ დაშავდა 10-ზე მეტი პოლიციელი. ასევე დაზიანდა შსს-ს ტექნიკა, რომლის ღირებულება ათიათასობით ლარს აღწევს. შსს-მ სიტუაციის განმუხტვის შემდეგ დაიწყო ინცინდენტის დეტალური შესწავლა. გამოძიება დაიწყო დანაშაულის ნიშნების შემცველ არაერთ ფაქტზე, რომლებზეც ამ ეტაპზე ინტენსიური საგამოძიებო მოქმედებები ტარდება. გამოძიება მათ შორის დაიწყო, აქციის ერთ-ერთი მონაწილის შოთა დალაქიშვილის მიმართ განხორციელებული თავდასხმის ფაქტზე. გამოძიების ფარგლებში შსს-ს კახეთის პოლიციის დეპარტამენტმა 16 დეკემბერს ველისციხეში გამართულ აქციაზე პოლიციელზე თავდასხმისთვის, ფიზიკური შეურაცხყოფისთვის და ქონების დაზიანებისთვის სს კოდექსის 353-ე პრიმა მუხლით მოსამართლის განჩინებით დააკავა გაერთიანებული ოპოზიციის მხარდამჭერი დავით კირკიტაძე. გამოძიება გრძელდება. ტარდება ყველა საგამოძიებო მოქმედება, მიმდინარეობს ვიდეო მასალის შესწავლა და არ არის გამორიცხული ბრალდებულთა წრე გაფართოვდეს, რის შესახებაც საზოგადოებას დამატებით მივაწვდით ინფორმაციას.