საქართველოს პრეზიდენტად არჩეულმა სალომე ზურაბიშვილმა დღეს კვლავ განაცხადა, რომ ინაუგურაციის ადგილად თელავის არჩევა, სადაც ნაკლები ხმა მიიღო, იმის სიმბოლური დასტურია, რომ ყველას პრეზიდენტია. „არავისზე არ ვარ გაბუტული, თუნდაც არ მომცეს ხმა. ვთვლი, რომ ინაუგურაციის რეგიონში ჩატარება არის ძალიან სწორი. ქვეყანაში პრინციპში, ყველაფერი ტარდება თბილისში და ეს სწორი არ არის. ეს არის გზავნილი არა მხოლოდ თელავის იმ ამომრჩევლისთვის, რომლებმაც არ მომცეს ხმა, ეს არის გზავნილი მთელი იმ საზოგადოებისთვის, რომელმაც თავი შეიკავა ჩემთვის ხმის მიცემისგან და სხვადასხვა პარტიას დაუჭირა მხარი, რომ მე მათი პრეზიდენტიც ვიქნები. ამისთვის მზად ვარ და ეს არის ამის მაჩვენებელი,"- უთხრა ჟურნალისტებს სალომე ზურაბიშვილმა.
საპრეზიდენტო არჩევნების მეორე ტურში ოპოზიციის კანდიდატმა გრიგოლ ვაშაძემ თელავში სალომე ზურაბიშვილს 776 ხმით მოუგო.
