"პანკისის ახალგაზრდების საინიციატივო ჯგუფი" (Youth initiative group of Pankisi) ფეისბუკის საკუთარ გვერდზე ეხმაურება ბოლო პერიოდში მიმდინარე მოვლენებს.
"პანკისის ახალგაზრდების საინიციატივო ჯგუფს გვსურს გამოვეხმაუროთ ბოლო პერიოდში გაჩენილ ტენდენციას, რომლითაც პოლიტიკური და ინტერესთა ჯგუფები ცდილობენ წარმოაჩინონ, რომ პანკისში ადგილობრივი საზოგადოების სოლიდარობა თემირლან მაჩალიკაშვილის ოჯახის ტრაგედიის მიმართ პოლიტიკური ნიშნით ორად არის გაყოფილი და დასუსტებულია. წინამდებარე განცხადებით ჩვენს ჯგუფს სურს კიდევ ერთხელ გამოხატოს სოლიდარობა თემირლან მაჩალიკაშვილის ოჯახის წევრების მიმართ და პოლიტიკურ ჯგუფებს მოუწოდოს შეწყვიტონ ჩვენი საზოგადოების და ჩვენი ტრაგედიების პოლიტიკური ინსტრუმენტალიზება..." - წერია განცხადებაში.
განცხადების თანახმად, პანკისში არ იცნობდნენ საშიშ, დამნაშავე, ტერორისტ თემირლან მაჩალიკაშვილს, შესაბამისად, ისინი ვერ ხედავენ მისი სიკვდილის მიზეზს:
"ახალგაზრდებს კარგად ესმით, რომ პანკისის ხეობაში სახელმწიფოს პოლიტიკა წლების განმავლობაში მნიშვნელოვნად არ იცვლება და ის მუდმივად უსაფრთხოების ხედვაზე დგას. ეს ხედვა კი ადგილობრივებს სახავს როგორც სახიფათო, რადიკალურ სოციალურ და რელიგიურ ჯგუფს, რომელსაც სახელმწიფო მხოლოდ ძალის და სოციალური კონტროლის საშუალებით შეიძლება გაუმკლავდეს. ამ ხედვაში ჩვენს სიცოცხლეს, ადამიანობას და ღირსებას მცირე ფასი აქვს და ხშირად ჩვენში აჩენს უფლებააყრილობის და დაუცველობის განცდას... შესაბამისი უწყებები კვლავ აგრძელებენ ძველ ტაქტიკას და მედია საშუალებების და არაეთიკური მეთოდების გამოყენებით ცდილობენ თემირლანი და პანკისელების საშიშ ელემენტად წარმოჩენას, რათა საზოგადოებაში შიში დათესონ და ადამიანებს პანკისელების მიმართ თანაგანცდის განწყობა დაუკარგონ..."
