ტელეკომპანია “რუსთავი 2” საპრეზიდენტო არჩევნების მეორე ტურამდე 3 დღით ადრე Edison research-ის ახალი კვლევის შედეგებს ასაჯაროებს, რომელიც ამომრჩეველთა განწყობას ეხება. კვლევა 12-დან 18 ნოემბრის ჩათვლით მთელი საქართველოს ტერიტორიაზე მიმდინარეობდა და მის ფარგლებში ხმის მიცემის უფლების მქონე 1038 მოქალაქე გამოიკითხა.
კითხვაზე ვის მისცემდით ხმას, საპრეზიდენტო არჩევნები დღეს რომ იმართებოდეს? პასუხები ასე გადანაწილდა:
გრიგოლ ვაშაძე: 37%
სალომე ზურაბიშვილი - 35 %
გამოკითხულთა დანარჩენი ნაწილი ან უარს ამბობს პასუხზე, ან ჯერ გადაწყვეტილი არ აქვს, ან ამბობს, რომ არცერთს არ აძლევს ხმას.
Edison research-ის წარმომადგენლები მოქალაქეებს დამატებით კითხვებსაც უსვამენ, რომელთა მონაცემებითაც იმ რესპონდენტების არჩევანიც ივარაუდეს, ვისაც ფავორიტი არ დაუსახელებია. შესაბამისად, ე.წ. ალოკაციის მეთოდით, შედეგები ასე ნაწილდება:
გრიგოლ ვაშაძე – 45%;
სალომე ზურაბიშვილი – 42%.
“რუსთავი2”-მა მაყურებელს შედეგების ის ვარიანტიც შესთავაზა, რომელსაც გადაუწყვეტელი და უარის მთქმელი პასუხები ჩამოცილებული აქვს. ამ მაჩვენებლით, გაერთიანებული ოპოზიციის კანდიდატ გრიგოლ ვაშაძეს 52%-იანი მხარდაჭერა აქვს, სალომე ზურაბიშვილს კი – 48% უჭერს მხარს.
კვლევის ცდომილება +/-2%-ია, 95%-იანი სანდოობის დონისათვის.
საპრეზიდენტო არჩევნების მეორე ტური საქართველოში 28 ნოემბერს იმართება.