თბილისში, ვაკეში, "მრგვალ ბაღში" ადგილობრივი მოსახლეობის ნაწილი აქციას მართავს. როგორც აქციის ორგანიზატორები აცხადებენ, ისინი ძალადობრივი რეჟიმის შესაძლო დაბრუნებას ეწინააღმდეგებიან. "ინტერპრესნიუსის" თანახმად, "მრგვალ ბაღში" გამოკრულია ბანერები, სადაც 2004-2018 წლებში ციხეებში გარდაცვლილი პატიმრების რაოდენობა წლებისმიხედვითაა ასახული. აქციის ორგანიზატორების ინფორმაციით, 2004-2011 წლებში ციხეში საქართველოს 330 000 მოქალაქე მოხვდა, დაკავებისას კი 52 ადამიანი მოკლეს.
"აქციის მიზანია დავანახოთ ხალხს, ამდენი ახალგაზრდა ვართ იმ აზრზე, რომ არ შეიძლება მოძალადეს დაუბრუნდეს ძალაუფლება. ეს არის აქციის მთავარი მიზანი. ჩვენ გავაკეთეთ ვიდეოები და სოციალურ ქსელში გავავრცელეთ, სადაც ხალხს შეუძლია ნახოს სტატისტიკური მონაცემები, რათა გაიხსენონ, რა კვალი დატოვა "ნაციონალური მოძრაობის" რეჟიმმა. ეს სტატისტიკა ნათლად ასახავს, რომ ამ ადამიანებს და ამ პოლიტიკურ ძალას არ შეიძლება დაუბრუნდეს ძალაუფლება", - აღნიშნა ჟურნალისტებთან საუბრისას აქციის ერთ-ერთმა ორგანიზატორმა როინ წერეთელმა. აღნიშნული აქციის მონაწილეები თავისუფლების მოედანზე მიმდინარე აქციაში მონაწილეობას არ აპირებენ და „ნაციონალური მოძრაობის“ წინააღმდეგ პროტესტს დამოუკიდებლად გამოხატავენ.
