ბრიტანელი ფინანსისტი ბილ ბრაუდერი, რომელზეც რუსეთს საერთაშორისო ძებნა აქვს გამოცხადებული, „კრიზისულად“ მიიჩნევს ვითარებას ინტერპოლის გარშემო. 20 ნოემბერს ლონდონში, „ხოდორკოსვსკის ცენტრში“ გამართულ პრეს-კონფერენციაზე, ბრაუდერმა განაცხადა, რომ თუ რუსი გენერალი გახდება ინტერპოლის ახალი ხელმძღვანელი, მაშინ დასავლეთს ალტერნატიული გეგმის განხილვა მოუწევს: ახალი წესების შემოღება, ან სრულიად ახალი საერთაშორისო ორგანიზაციის შექმნა. ბრაუდერის თქმით, ის უკვე გამოვიდა ინტერპოლში რუსეთის მუშაობის შეჩერების ინიციატივით.
ინტერპოლის პრეზიდენტად გენერალ ალექსანდრ პროკოპჩუკის შესაძლო არჩევა ბრაუდერმა შეადარა ამ ორგანიზაციის მაფიისათვის ჩაბარებას. მანამდე ამერიკელმა სენატორებმა გააკეთეს განცხადება ინტერპოლის პრეზიდენტად პროკოპჩუკის დანიშვნის წინააღმდეგ. ბრაუდერი აშშ-ში დაბადებული ბრიტანელია, რომელიც ერთ დროს რუსეთისთვის უმსხვილესი უცხოელი ინვესტორი იყო, თუმცა შემდეგ მთავრობასთან ურთიერთობა დაეძაბა და ახლა პრეზიდენტ ვლადიმირ პუტინთან დაპირისპირებაშია.
ამ კვირაში რუსეთმა ახალი ბრალდებები წაუყენა ბრაუდერს: ის ახლა ეჭვმიტანილია თავისი ახლობლის, სერგეი მაგნიტსკის 10 წლის წინ, მოსკოვის ციხეში სიკვდილთან კავშირში. 19 ნოემბერს გავრცელებულ განცხადებებში, რომლებსაც ბრაუდერმა უკვე უწოდა უსაფუძვლო და "კაფკიანური", სახელმწიფო პროკურორებმა ასევე თქვეს, რომ მათ ბრაუდერს დაუსწრებლად წაუყენეს ბრალი "ტრანსნაციონალური კრიმინალური ჯგუფის" ფორმირებაში.
