17 ნოემბერს, პაპუა-ახალ გვინეაში მიმდინარე აზია-წყნარი ოკეანის ეკონომიკური თანამშრომლობის, იგივე APEC-ის სამიტზე მწვავედ იდავეს ჩინეთმა და აშშ-მა. თავის გამოსვლაში აშშ-ის ვიცე-პრეზიდენტმა, მაიკ პენსმა განაცხადა, ვაშინგტონი "არ შეცვლის თავის კურსს, სანამ ჩინეთი შეცვლის თავისასო". აშშ-მა გადასახადები დაუწესა ჩინეთის მიერ წარმოებულ, 250 მილიარდი დოლარის ოდენობის საქონელს და ჩინეთმაც გადადგა საპასუხო ნაბიჯები. პენსმა პეკინი დაადანაშაულა ინტელექტუალური საკუთრების მითვისებაში, სახელმწიფო ბიზნესების მსხვილ სუბსიდირებაში და "უზარმაზარი" წინაღობების დაწესებაში უცხოეთის კომპანიებისთვის, რომლებიც ჩინეთის ბაზარზე შედიან. პენსმა ასევე გააკრიტიკა ჩინეთის გლობალური ინფრასტრუქტურული მისწრაფება, რომელიც "სარტყლისა და გზის ინიციატივის" ("Belt and Road Initiative") სახელითაა ცნობილი - განაცხადა, რომ ბევრი პროექტი დაბალი ხარისხისაა და, ამავე დროს, ისინი განვითარებად ქვეყნებს დიდძალ დავალიანებას აკისრებს. აშშ, როგორც დემოკრატია, უკეთესი პარტნიორია, ვიდრე ავტორიტარული ჩინეთიო, განაცხადა მან. პენსამდე სიტყვით გამოვიდა ჩინეთის პრეზიდენტი, სი ძინპინი, რომელმაც თქვა, რომ ქვეყნები დგანან არჩევანის წინაშე - ან თანამშრომლობა, ან კონფრონტაცია იმ ფონზე, როცა მატულობს პროტექციონიზმი და ცალმხრივობა.