საქართველოს პარლამენტმა დღის პირველ ნახევარში ვერ განიხილა 2019 წლის სახელმწიფო ბიუჯეტის პროექტი. პირველი რეგისტრაციის შედეგად ტაბლოზე 79 დეპუტატი დაფიქსირდა, თუმცა, ოპოზიციის წარმომადგენლებმა განაცხადეს, რომ უმრავლესობის წევრებმა სხვისი პულტებით ისარგებლეს. საკითხის გარკვევა მანდატურის სამსახურს დაევალა. რამდენიმე წუთის შემდეგ, განმეორებითი რეგისტრაციის შედეგად ტაბლომ 78 დეპუტატი დააფიქსირა. უმცირესობის დეპუტატის ირმა ნადირაშვილის განცხადებით, მანდატურისგან მიღებული ინფორმაციით, დარბაზში იმყოფებოდა 80 დეპუტატი, თუმცა, ოპოზიციის 8 წარმომადგენელს რეგისტრაცია არ გაუვლია. უმცირესობამ უმრავლესობის წევრები დაადანაშაულა სხვისი, მათ შორის ნუკრი ქანთარიას პულტის გამოყენებაში. თავის მხრივ, საპარლამენტო უმრავლესობამ ოპოზიციას ბრალი დასდო ბოიკოტსა და საბოტაჟში. მანდატურის სამსახურის განმარტებით, სხდომათა დარბაზში იმყოფებოდნენ, მაგრამ რეგისტრაციის გავლა ვერ მოასწრეს დეპუტატებმა რომან კაკულიამ, ეკა ბესელიამ, გოდერძი ჩანქსელიანმა და გოჩა ენუქიძემ. საკითხის განსახილველად საჭირო კვორუმი 76-ია. პარლამენტის სხდომის წამყვანმა, ვიცე-სპიკერმა გია ვოლსკიმ 16 საათამდე შესვენება გამოაცხადა და ფრაქციების ხელმძღვანელებს დეპუტატების მობილიზებისკენ მოუწოდა. ვოლსკის ვარაუდით, დღეს მუშაობა 21 საათამდე მოუწევთ.
