„ახალგაზრდა იურისტთა ასოციაციის“ დამკვირვებელთა ინფორმაციით, საპრეზიდენტო არჩევნებში მთლიანობაში ამომრჩეველს შესაძლებლობა ჰქონდა ნება თავისუფალ გარემოში გამოეხატა და კენჭისყრის პროცესმა ძირითადად მშვიდ ვითარებაში ჩაიარა. ორგანიზაციის შეფასებით, არჩევნების განმავლობაში გამოვლენილ დარღვევებს მნიშვნელოვანი გავლენა კენჭისყრის პროცესზე არ მოუხდენია.
2018 წლის პრეზიდენტის არჩევნების კენჭისყრის დღის ზოგადი შეფასებით, წინა არჩევნებისგან განსხვავებით, მიმდინარე არჩევნებზე კოორდინატორების მიერ ამომრჩევლის ნების სავარაუდო კონტროლს დაემატა პრეზიდენტობის კანდიდატის, სალომე ზურაბიშვილის საარჩევნო შტაბიდან სატელეფონო ზარებით ამომრჩევლის ნების სავარაუდო კონტროლის ტენდენციაც.
რაც შეეხება დარღვევებს: “დაფიქსირდა არსებითი დარღვევები, მათ შორის ამომრჩევლის მოსყიდვის სავარუდო ფაქტი, რომელიც შესაძლოა შეიცავდეს სისხლის სამართლის დანაშაულის ნიშნებს (სამგორის #56 უბანი), აგრეთვე, ფიზიკური დაპირისპირებისა (მარნეულის #59 უბანი) და საარჩევნო ბიულეტენის უბნიდან გატანის ფაქტი (საბურთალოს #52 და სამგორის #78 უბნები).“
არსებითი დარღვევების გარდა, საიას დამკვირვებლებმა პროცედურული დარღვევებიც გამოავლინეს. კერძოდ, საიას თანახმად, ადგილი ჰქონდა წილისყრის პროცედურის დარღვევას, წილისყრით გამოვლენილი ფუნქციების თვითნებურ შეცვლას, ვადაგასული პირადობის მოწმობით ხმის მიცემას, მარკირების პროცედურის დარღვევას, უკანონო აგიტაციას საარჩევნო უბანზე,სამაგიდო სიის დაზიანებას და სხვა.
საიას დამკვირვებლებმა საერთო ჯამში 100-ზე მეტი საჩივარი დაწერეს. ამ ეტაპზე ორგანიზაცია საოლქო კომისიებში შედეგების შეჯამებისა და საარჩევნო დავების განხილვის მონიტორინგს ახორციელებს.
