საქართველოს შინაგან საქმეთა მინისტრის, გიორგი გახარიას განცხადებით, სამინისტრო და პირადად ის არ ვაჭრობენ საკუთარი თანამშრომლების თანამდებობებით. „ეს ერთი. მეორე - ასე გვეძახდნენ ზუსტად, რომ მირზა სუბელიანს ვერ დავიჭერდით, მაგრამ მირზა სუბელიანი დღეს არის პატიმარი და რამდენსაც გადაწყვეტს ქართული სასამართლო, იჯდება ზუსტად იმდენი“ - უთხრა ჟურნალისტებს გიორგი გახარიამ. შეკითხვას, რატომ არ დააკავეს სუბელიანი დაკითხვამდე, გახარიამ უპასუხა, რომ დაკითხვის საფუძველი გახდა სასამართლო პროცესებზე იმ მოწმეთა ჩვენებები, რომლებიც მანამდე დუმილის უფლებას იყენებდნენ. „არ მინდა დეტალებში წავიდე და გეტყვით რატომ? შინაგან საქმეთა სამინისტრო არის პოლიტიკურად ნეიტრალური უწყება. დღეს არ მაქვს არანაირი უფლება და სურვილი დეტალებში ვისაუბრო ამ საქმეზე მხოლოდ იმ მიზეზით, რომ ვართ არჩევნების კონტექსტში და ეს ყველაფერი კეთდება არჩევნების კონტექსტიდან გამომდინარე. გარწმუნებთ, ყველა ამ შეკითხვაზე იქნება როგორც სამართლებრივი პასუხი ისე პოლიტიკური მას შემდეგ, რაც შსს ქვეყანასთან ერთად ჩაატარებს მშვიდ, უსაფრთხო გარემოში არჩევნებს და მივიღებთ იმ შედეგს, რომელსაც ქართველი ხალხი გადაწყვეტს“ - განაცხადა გიორგი გახარიამ. მისი თქმით, ყველა შეკითხვას გამოძიებით გაეცემა სამართლებრივი პასუხი. შინაგან საქმეთა მინისტრის შეფასებით, ყველა ის საქმე, რომელიც დღეს განიხილება სხვადასხვა ტელეარხზე, სხვადასხვა ინტონაციით, გამომდინარეობს სწორედ არჩევნების კონტექსტიდან და შედის იმ პოლიტიკური კონიუნქტურის ინტერესებში, რომელსაც უნდა დაძაბულობის და პოლიტიკური ტემპერატურის გაზრდით მიაღწიოს რაღაც შედეგს.