" იმის გამო, რომ საქართველოს ტერიტორიის 20% რუსეთის მიერაა ოკუპირებული, ამიტომ არასწორია საქართველოს მართლმადიდებელმა ეკლესიამ უპირობოდ მხარი დაუჭიროს კონსტანტინოპოლის ეკლესიას." - უთხრა დეკანოზმა გიორგი ბოტკოველმა "ინტერპრესნიუსს". მისი თქმით, საქართველოს ეკლესიის პოზიცია ამ საკითხზე როგორი იქნება, სინოდის სხდომაზე გაირკვევა, რომელიც ამ დროისთვის ცნობილი არ არის, როდის გაიმართება.
„ეს არის უაღრესად მნიშვნელოვანი საკითხი, საკითხი, რომელიც ძალიან მძიმე შედეგებს შემოიტანს მართლმადიდებელ ეკლესიებს შორის ურთიერთობებში, თუ რა თქმა უნდა, ორ დიდ საპატრიარქოს შორის ეს კრიზისი კიდევ უფრო გაღრმავდება და რთულ ფორმებს მიიღებს. ამ ეტაპზე ჩვენ ვისმენთ ორ ეკლესიას შორის დავას ტერიტორიულ საზღვრებთან დაკავშირებით. კონსტანტინოპოლის ეკლესია ასაბუთებს, რომ მას აქვს უფლება ერთპიროვნულად მიიღოს გადაწყვეტილებები უკრაინასთან მიმართებაში და მოსკოვის საპატრიარქო ეწინააღმდეგება კონსტანტინოპოლის საპატრიარქოს ამ პოზიციას. მათ შორის დავა კანონიკური სამართლის ნორმებით უნდა გადაწყდეს, ეს უცილობელია. იმის გამო, რომ საქართველოს ტერიტორიის 20% რუსეთის მიერაა ოკუპირებული, უპირობოდ მხარი დავუჭიროთ კონსტანტინოპოლის ეკლესიას, არასწორია. ვიდრე არგუმენტები საფუძვლიანად არ იქნება ჩამოყალიბებული და საეკლესიო სამართლის ნორმებით არ იქნება ეს პოზიცია გამყარებული, მანამდე ჩვენ, რა თქმა უნდა, პოზიციის დაფიქსირებისგან თავს შევიკავებთ. ამავე დროს, დაველოდებით სხვა მართლმადიდებელი ეკლესიების პოზიციების დაფიქსირებას – როგორ ფიქრობენ ისინი და რა პოზიცია მიაჩნიათ მათ მართებულად. ამ პოზიციებში კარგად გარკვევის და შეჯერების შემდეგ, ამაზე უკვე წმინდა სინოდი იმსჯელებს, თუ რა პოზიცია უნდა დაიკავოს საქართველოს მართლმადიდებელმა ეკლესიამ. ეს საკითხი აუცილებლად წმინდა სინოდის სხდომაზე უნდა გადაწყდეს, რადგან მღვდელმთავრებმა აუცილებლად უნდა დააფიქსირონ თავიანთი პოზიცია ამ საკითხზე“, – განაცხადა მამა მიქაელმა.
