აშშ-ის მთავრობამ საქართველოს შინაგან საქმეთა სამინისტროს გადასცა "აილენდის" კლასის ორი სადარაჯო ხომალდი. მათი სახელწოდებებია „დიოსკურია" და „ოჩამჩირე." სანაპირო დაცვის სამსახურისთვის ხომალდების გადაცემის ცერემონია ფოთის პორტში გაიმართა. პრემიერ-მინისტრმა მამუკა ბახტაძემ აშშ-ს მადლობა გადაუხადა და განაცხადა, რომ ვაშინგტონის ეს ნაბიჯი ხაზს უსვამს საქართველოსა და მთლიანად შავი ზღვის რეგიონის უსაფრთხოებისა და სტაბილურობის ურყევ მხარდაჭერას. ბახტაძის თქმით, საქართველო გადადგამს უფრო მეტ პრინციპულ ნაბიჯს იმისთვის, რომ ქვეყნის სანაპირო დაცვის სამსახური იყოს უფრო ეფექტური და უფრო აქტიური როლი შეასრულოს შავი ზღვის რეგიონში უსაფრთხოებისა და მშვიდობის განმტკიცებაში. „საქართველოსა და აშშ-ს შორის ურთიერთობა და პარტნიორობა ასეთ მაღალ დონეზე არასდროს ყოფილა. მსურს, ვისარგებლო შემთხვევით და ყველას დიდი მადლობა გადავუხადო იმისთვის, რომ ეს ურთიერთობა ავიდა სტრატეგიულ და ასეთ მაღალ დონეზე“ - განაცხადა მამუკა ბახტაძემ. პრემიერ-მინისტრმა აღნიშნა, რომ შავი ზღვა მსოფლიო უსაფრთხოების არქიტექტურაში აუცილებლად შეასრულებს განსაკუთრებულ როლს და მნიშვნელოვანია, რომ სტრატეგიულ პარტნიორებს კარგად ესმით შავი ზღვის რეგიონისა და საქართველოს როლი მსოფლიო უსაფრთხოების არქიტექტურაში.
