საქართველოს ყოფილი პრემიერ-მინისტრის, ვანო მერაბიშვილის ადვოკატის გიორგი ჩივიაშვილის შეფასებით, ბოლო ორი თვეა სპეციალური პენიტენციური სამსახური არათანმიმდევრულობას იჩენს. გიორგი ჩივიაშვილის თქმით, ვანო მერაბიშვილის მდგომარეობის გაუარესება დაიწყო 15 აგვისტოდან და მას შემდეგ, სასჯელაღსრულების დაწესებულებიდან სამჯერ გადაიყვანეს სამოქალაქო კლინიკებში. „თავიდან გვითხრეს, რომ მას ჰქონდა თვალის ანთება, მერე გვითხრეს, რომ იყო მხოლოდ სასუნთქი გზების პრობლემა. მკურნალობა დაუწყეს წვეთებით თვალის ანთებისთვის და აეროზოლით, რომელსაც ცხვირში იწვეთებდა. მესამე გაყვანის შემდეგ გვეუბნებიან, რომ ეს არის ჰორნერის სინდრომი, რაც ნიშნავს სახის ნაწილობრივ დამბლას და პლუს შესაძლოა, გამოწვეული იყოს, როგორც სპეციალისტები ამბობენ, სხვადასხვა დაავადებით. ეს შეიძლება იყოს სიმსივნური და შესაძლოა, იყოს ინტოქსიკაციური “ - უთხრა რადიო თავისუფლებას გიორგი ჩივიაშვილმა. მისი განცხადებით, აქვთ ეჭვი, რომ ვანო მერაბიშვილის მდგომარეობა კიდევ უფრო მძიმეა და მოითხოვენ, რომ გადაიყვანონ მრავალპროფილიან სამოქალაქო საავადმყოფოში, სადაც სრულყოფილად გამოიკვლევენ. გიორგი ჩივიაშვილის თქმით, აღარ სჯერათ პენიტენციური სამსახურის, რადგან არ შეიძლება ადამიანს უმკურნალო და ორ თვეში მდგომარეობა კიდევ უფრო გაუარესდეს და ორ თვეში დაისვას ოთხი სხვადასხვა დიაგნოზი.
