ბრაზილიაში დანით დაჭრეს სოციალ-ლიბერალური პარტიის წევრი პარლამენტარი და ქვეყნის პრეზიდენტობის კანდიდატი, ჟაირ ბოლსონარუ. მას „ბრაზილიელ ტრამპად“ მოიხსენიებენ ხოლმე. ბოლსონარუ მუცლის არეში დაჭრეს აღმოსავლეთ ბრაზილიაში ამომრჩევლებთან შეხვედრისას. ჭრილობა ზედაპირულია და პარლამენტარის სიცოცხლეს საფრთხე არ ემუბრება. ბრაზილიის მედიის თანახმად, თავდამსხმელი დააკავეს. ბრაზილიაში 7 ოქტომბერს გაიმართება საპრეზიდენტო არჩევნები და 63 წლის ბოლსონარუ ფავორიტად ითვლება მას შემდეგ, რაც სასამართლომ რეგისტრაციაზე უარი უთხრა ყოფილ პრეზიდენტს, ლულა და სილვას. მას 12 წლით პატიმრობა აქვს მისჯილი კორუფციაში დამნაშავედ ცნობის საფუძველზე. საზოგადოებრივი აზრის გამოკითხვის შედეგებით, ბოლსონარუს მხარს უჭერს ამომრჩევლების 22 პროცენტი. ის მიჩნეულია „საპროტესტო კანდიდატად“, რომელიც წინასაარჩევნო კამპანიაში იყენებს ჰომოფობიურ და რასისტულ გამონათქვამებს და ემხრობა სიკვდილით დასჯის აღდგენას.
