ერთი ადამიანი დაიღუპა და სამი დაშავდა ქალაქ ფოთში გამთენიისას მომხდარი აფეთქების შედეგად. წინასწარი ინფორმაციით, ახალგაზრდებს ჯერჯერობით დაუდგენელი მოწყობილობა აუფეთქდათ. ფოთის ცენტრალური კლინიკური საავადმყოფოს დირექტორმა, თეა მიგინეიშვილმა სააგენტო „ინტერპრესნიუსს“ განუცხადა, რომ კლინიკაში მიიყვანეს 4 პირი, თუმცა ერთს სიცოცხლესთან შეუთავსებელი დაზიანებები აღენიშნებოდა და გარდაიცვალა. სამი დაშავებულიდან ერთი ფოთის ცენტრალური კლინიკური საავადმყოფოდან ზუგდიდის რეფერალურ ჰოსპიტალში, მეორე კი - ქუთაისის ინტერვენციული მედიცინის ცენტრში გადაიყვანეს. მესამე პირს კი, მიგინეიშვილის ინფორმაციით, გაეწია გადაუდებელი ამბულატორიული დახმარება და სახლში გაეწერა. „დაშავებულებს ტრავმული შოკი და მრავლობითი დაზიანებები აღენიშნებათ“ - განაცხადა კლინიკის დირექტორმა.
შინაგან საქმეთა სამინისტრომ გამოძიება დაიწყო ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვის და ჯანმრთელობის გაუფრთხილებლობით დაზიანების მუხლებით.
