კრემლის პრესმდივნის, დმიტრი პესკოვის შეფასებით, სირიაში ვითარების მიმართ „არაყოვლისმომცველ“ მიდგომას გამოხატავს იდლიბის პროვინციის შესახებ „რაღაც გაფრთხილებებით“ გამოსვლა. ამ განცხადებით პესკოვი გამოეხმაურა აშშ-ის პრეზიდენტ დონალდ ტრამპის გარფთხილებას სირიის პრეზიდენტისა და მისი მოკავშირეების, ირანისა და რუსეთის მიმართ, ნუ მოაწყობენ “გაუაზრებელ თავდასხმას“ იდლიბზე, სადაც შესაძლოა ასიათასობით ადამიანი დაიღუპოს. იდლიბი არის უკანასკნელი პროვინცია, რომელსაც სირიაში ოპოზიცია აკონტროლებს. ტრამპი იდლიბთან დაკავშირებული გაფრთხილებით გამოვიდა ტვიტერში 3 სექტემბერს დაწერილ ტექსტში. პესკოვმა კი 4 სექტემბერს თქვა, რომ „იდლიბში შექმნილი ვითარება კვლავაც ღრმა შეშფოთებას იწვევს მოსკოვში, დამასკში, ანკარასა და თეირანში“. მისი თქმით, პროვინციაში „ექსტრემისტების“ ყოფნა ძირს უთხრის სირიის სამშვიდობო პროცესს და რეგიონს აქცევს ბაზად სირიაში რუსეთის ჯარებზე თავდასხმებისათვის. „ჩვენ ვიცით, რომ სირიის მთავრობის ჯარები ემზადებიან ამ პრობლემის მოსაგვარებლად“, განაცხადა პესკოვმა.
