პირველი ექსპერიმენტული სკოლის დირექტორი ხათუნა ბარამაძე თანამდებობიდან გადადგა. რადიო თავისუფლებასთან საუბარში მან განაცხადა, რომ ამ გადაწყვეტილების მთავარი მიზეზი ხორავას ქუჩაზე 2017 წლის დეკემბერში მომხდარი გახმაურებული მკვლელობაა. ხათუნა ბარამაძემ გადადგომის მოთხოვნით სკოლის სამეურვეო საბჭოს პირველად ჯერ კიდევ 2 თებერვალს მიმართა, თუმცა მაშინ საბჭომ მისი მოთხოვნა არ დააკმაყოფილა.
„ძალიან მძიმე გადასატანი იყო ჩემთვის ყველაფერი, რაც საზოგადოებაში ხდებოდა, თუმცა მაშინ სამეურვეო საბჭომ საჭიროდ ჩათვალა, რომ იმ პერიოდში სკოლაში უნდა დავრჩენილიყავი და მუშაობა გამეგრძელებინა. სკოლაში ძალიან დაძაბული მდგომარეობა იყო. სასწავლო წლის დასრულებისთანავე საბჭოს იმავე თხოვნით მეორედ მივმართე. ჩემი 27-წლიანი მუშაობის პერიოდში ასეთი შემთხვევა პირველი იყო“, - უთხრა რადიო თავისუფლებას პირველი ექსპერიმენტული სკოლის ყოფილმა დირექტორმა.
ხათუნა ბარამაძე განათლების სისტემაში დარჩება, თუმცა არ გეგმავს რომელიმე სხვა სკოლის დირექტორობას.
პირველ ექსპერიმენტულ სკოლაში ის მოზარდები სწავლობდნენ, რომლებიც ხორავას ქუჩის მკვლელობის საქმეში ფიგურირებდნენ, მათ შორის ლევან დადუნაშვილის მკვლელობისთვის მსჯავრდებული გ.ბ. და დავით სარალიძის მკვლელობის მცდელობისთვის მსჯავრდებული გ.ჯ.