ავღანეთის ოფიციალური პირების განცხადებით, ტაჯიკეთთან საზღვრის სიახლოვეს ამოუცნობმა საჰაერო ხომალდმა თალიბანის ძალებზე მიიტანა იერიში, რასაც რვა ექსტრემისტი ემსხვერპლა - ერთ დღეში მას შემდეგ, რაც სროლას შეეწირა სულ მცირე ორი ტაჯიკი. თავდამსხმელი ხომალდის კუთვნილება ჯერჯერობით უცნობია. ტაჯიკეთი უარყოფს რომ ეს მისი თვითმფრინავი ან ვერტმფრენი იყო, ამ ცნობას ასევე უარყოფს რუსეთი, რომელსაც ტაჯიკეთში მნიშვნელოვანი სამხედრო კონტინგენტი ჰყავს. ავღანეთის ტახარის პროვინციის პოლიციის პრესმდივნის, ხალილ ასირის განცხადებით, თავდასხმა მოხდა 27 აგვისტოს, დილით ადრე, საზღვრის ახლოს მდებარე დარყადის პროვინციაში. მისი თქმით, დაჭრილია კიდევ ექვსი ექსტრემისტი. ავღანეთსა და ტაჯიკეთს შორის 1400 კილომენტრიანი საზღვრის გასწვრივ შეტაკებები იშვიათად ხდება. თუმცა ზოგიერთი სასაზღვრო პროვინციაში, ტახარის ჩათვლით, უსაფრთხოების ვითარება მნიშვნელოვნად გაუარესდა ბოლო თვეებში და ავღანეთის ძალებსა და ექსტრემისტულ ჯგუფებს, მათ შორის თალიბანს შორის გახშირდა შეტაკებები.
