შეიარაღებული პირები თავს დაესხნენ დაზვერვის სააგენტოს საწვრთნელ ცენტრს ქაბულში. ეს მოხდა 24 საათზე ნაკლებ დროში მას შემდეგ, რაც 34 ადამიანი შეიწირა ქაბულის შიიტურ უბანში თვითმკვლელის მიერ მოწყობილმა აფეთქებამ. მაშინ, როცა შიიტები დაღუპულებს ასაფლავებდნენ, დაზვერვის სააგენტოს საწვრთნელ ცენტრში დაიწყო შეტაკება თავდამსხმელებსა და ავღანეთის უშიშროების ძალებს შორის. ქაბულის პოლიციის წარმომადგენლის განცხადებით, დაუდგენელი რაოდენობის თავდამსხმელები ალყაში არიან მომწყვდეული საწვრთნელი ცენტრის მახლობლად მდებარე შენობაში, საიდანაც ნაღმსატყორცნიდან და სხვა იარაღს ესვრიან სამთავრობო ობიექტს. ჯერ არაფერს იუწყებიან შეტაკების მსხვერპლის რაოდენობაზე და თავდამსხმელების ვინაობაზე. ამასობაში, ავღანეთის ხელისუფლებამ გაავრცელა გადასინჯული ინფორმაცია 15 აგვისტოს თვითმკვლელის მიერ მოწყობილი აფეთქების მსხვერპლთა რიცხვზე: განსხვავებით ადრე გავრცელებული ცნობისაგან, რომ დაიღუპა 48 ადამიანი, ახლა იუწყებიან 34 დაღუპულის შესახებ. ექსტრემისტების გაერთიანება „ისლამურმა სახელმწიფომ“ აიღო პასუხისმგებლობა ადაშთ-ე ბარჩის რაიონში მოწყობილ ამ აფეთქებაზე.