რუსეთის საგარეო საქმეთა მინისტრის მოადგილის, გრიგორი კარასინის განცხადებით, ბოლო ხანს ვითარება გაუარესდა საქართველოში შვეიცარიის საელჩოსთან არსებული, რუსეთის ინტერესთა სექციის გარშემო. რუსეთის საგარეო საქმეთა სამინისტროს ინფორმაციით, ეს საკითხი კარასინმა განიხილა რუსეთში შვეიცარიის ელჩთან დღეს გამართულ შეხვედრაზე. კარასინის თქმით, ვითარება გაუარესდა ადგილობრივი კრიმინალური ელემენტების ქმედებების შედეგად, რომლებიც სარგებლობენ საქართველოს მოქალაქეებში რუსეთის ვიზაზე მაღალი მოთხოვნით და ამით მდიდრდებიან. რუსეთის საგარეო საქმეთა სამინისტროს ცნობითვე, შვეიცარიული მხარე რუსულს დაპირდა ზომების მიღებას საქართველოს ხელისუფლების მიერ ამ საკითხში წესრიგის დასამყარებლად
ივლისის ბოლოს ცნობილი გახდა, რომ საქართველოს შინაგან საქმეთა სამინისტრო იძიებს რუსეთის ვიზების მისაღებად მოქალაქეებისგან 350-550 აშშ დოლარის მოთხოვნის სავარაუდო ფაქტებს. გამოძიებას საფუძვლად დაედო "რუსთავი 2"-ის ინფორმაცია, რომ რუსეთის ვიზის დროულად მიღება შესაძლებელია მხოლოდ ამ თანხის გადახდის შემთხვევაში.