საფრანგეთის პრეზიდენტის ადმინისტრაციის ცნობით, ემანუელ მაკრონმა რუსეთის პრეზიდენტთან სატელეფონო საუბრის დროს განიხილა უკრაინელი კინორეჟისორის, ოლეგ სენცოვის ბედი. რუსეთის მიერ ტერორისტული საქმინობისათვის მსჯავრდებული სენცოვი თითქმის მესამე თვეა შიმშილობს ერთ-ერთ ციხეში. საფრანგეთის პრეზიდენტმა გადასცა რუს კოლეგას თავისი შეშფოთება სენცოვის ჯანმრთელობის „სახიფათოდ გაუარესების“ გამო და ხაზი გაუსვა რუსეთის მიერ ამ პრობლემის „სასწრაფოდ გადაჭრის“ მნიშვნელობას. „პრეზიდენტმა პუტინმა ივალდებულა, რომ ოპერატიულად მოახდენს რეაგირებას და მალე გამოქვეყნდება ინფორმაცია სენცოვის ჯანმრთელობის შესახებ“, - ნათქვამია საფრანგეთის პრეზიდენტის ადმინისტრაციის მიერ 10 აგვისტოს გავრცელებულ განცხადებაში. ორი პრეზიდენტის სატელეფონო საუბრის თაობაზე კრემლის მიერ გავრცელებულ ცნობაში არ იყო ნახსენები სენცოვი, მაგრამ მოგვიანებით სააგენტო „ინტერფაქსმა“ მოიყვანა კრემლის პრესმდივნის, დმიტრი პესკოვის ციტატა, რომლის თანახმად ორმა ლიდერმა ისაუბრა კინორეჟისორის ბედზე. 42 წლის სენცოვი თითქმის სამი თვეა შიმშილობს რუსეთში დაკავებული 64 უკრაინელის გათავისუფლების მოთხოვნით და, ცნობების თანახმად, მისი ჯანმრთელობის მდგომარეობა მკვეთრად არის გაუარესებული. ოლეგ სენცოვს 2015 წელს მიუსაჯეს პატიმრობა ტერორისტული აქტების ჩადენის შეთქმულების ბრალდებით, რასაც თავად სენცოვი და უფლებადამცველი ჯგუფები პოლიტიკურად მოტივირებულს უწოდებენ. რეჟისორი სასჯელს იხდის რუსეთის ჩრდილოეთით, იამალო-ნენეცის რეგიონში.