ბელორუსიაში დააკავეს კიდევ ორი ჟურნალისტი, რომლებიც ეჭვმიტანილნი არიან ინფორმაციის უკანონოდ მოპოვებაში სახელმწიფო საინფორმაციო სააგენტო BelTA-სგან. ეს ფაქტი კიდევ უფრო აღრმავებს შეშფოთებას, რომ ბელორუსიაში იზრდება ზეწოლა დამოუკიდებელ ჟურნალისტებზე. ბელორუსიის საგამოძიებო კომიტეტმა 9 აგვისტოს განაცხადა, რომ დაკავებულია დამოუკიდებელი სააგენტოს, BelaPAN-ის მთავარი რედაქტორი, ირინა ლეიშენია და საქმე უკავშირდება "უკანონო წვდომას კომპიუტერულ ინფორმაციასთან". მანამდე, 8 აგვისტოს კომიტეტმა თქვა, რომ ამავე საქმის ფარგლებში დააკავეს პაულიუკ ბიკოუსკი, გერმანიის დოიჩე ველეს ადგილობრივი კორესპონდენტი და ერთ-ერთი ადგილობრივი ვებსაიტის რედაქტორი. დაკავებულის ცოლმა, ოლგა ბიკოუსკაიამ რადიო თავისუფლებას უთხრა, რომ დაკავებამდე პოლიციელებმა კონფისკაცია გაუკეთეს მისი ქმრის კომპიუტერებს და საკრედიტო ბარათებს. ბელორუსიაში წლებია ზეწოლას განიცდიან ჟურნალისტები, რომლებიც კრიტიკულად აშუქებენ პრეზიდენტ ალექსანდრ ლუკაშენკოს და მის მთავრობას.
