ევროკავშირი და უკრაინა 9 ივლისს თავიანთ ყოველწლიურ სამიტს გამართავენ და იმსჯელებენ კიევის რეფორმატორულ გეგმებზე, ისევე როგორც რუსეთის მიერ 2014 წელს ყირიმის ანექსირებაზე და აღმოსავლეთ უკრაინაში სეპარატისტების მხარდაჭერაზე. სამიტი, რომელიც ბრიუსელში გაიმართება და რომელშიც მონაწილეობას მიიღებს უკრაინის პრეზიდენტი, პეტრო პოროშენკო, პირველია მას შემდეგ, რაც სექტემბერში ამოქმედდა ასოცირების ხელშეკრულება ევროკავშირსა და უკრაინას შორის. თავდაპირველი გეგმით, ეს ხელშეკრულება 2013 წლის ნოემბერში უნდა გაფორმებულიყო, მაგრამ უკრაინის მაშინდელმა პრეზიდენტმა, ვიქტორ იანუკოვიჩმა მასზე უარი თქვა, მოსკოვის ზეწოლის შედეგად - რამაც მასობრივი საპროტესტო ტალღა და იანუკოვიჩის გადადგომა გამოიწვია. რუსეთმა ამის პასუხად უკრაინის ყირიმის ნახევარკუნძულის ანექსირება მოახდინა და სამხედრო და ეკონომიკურ დახმარებას უწევს კიევის წინააღმდეგ მებრძოლ სეპარატისტებს ომში, რომელსაც აღმოსავლეთ უკრაინაში 10300-ზე მეტი ადამიანი შეეწირა. ევროკავშირის განცხადებით, წლევანდელ სამიტზე მხარეები იმსჯელებენ ასოცირების ხელშეკრულების განხორციელების გზებზე, თავისუფალი ვაჭრობის საკითხებზე და უკრაინის რეფორმების პროგრესის ხარისხზე.
