გერმანიამ და ავსტრიამ საზღვარზე დაიწყეს ერთობლივი პატრულირება არალეგალურ მიგრაციასა და დანაშაულთან ბრძოლის გასაძლიერებლად. სააგენტო DPA-ს ინფორმაციით, ერთობლივი პატრულირების რაიონია ალპებში მდებარე ბრენერის უღელტეხილი. პირველ ეტაპზე გერმანიის და ავსტრიის სასაზღვრო პოლიციის პატრულირება სამ თვეს გასტანს და მისი გაგრძელების საკითხი შედეგების შესაბამისად გადაწყდება. გერმანელი და ავსტრიელი მესაზღვრეები მკაცრად გააკონტროლებენ სარკინიგზო მიმოსვლას, განსაკუთრებით სატვირთო შემადგენლობებს. გერმანიის ფედერალური პოლიციის წარმომადგენლის, ტომას ბოროვიკის განცხადებით, მიგრანტები ხშირად იყენებენ სწორედ სატვირთო მატარებლებს და ამით საფრთხეში აგდებენ საკუთარ სიცოცხლეს. 2017 წელს, გერმანიის ფედერალური პოლიციის მიუნხენის სამმართველომ სატვირთო მატარებლების სახურავებზე და ვაგონებს შორის აღმოაჩინა ათასამდე მიგრანტი. შარშან, ავსტრია-გერმანიის საზღვარზე სულ დააკავეს 14 600-მდე ადამიანი, რომლებიც გერმანიის ტერიტორიაზე არალეგალურად შესვლას ცდილობდნენ. მათგან 7200 უკან დააბრუნეს. 2018 წლის პირველ ოთხ თვეში დაკავებულია 3800-მდე მიგრანტი.