15.00 საათზე პარლამენტის წინ განახლდა აქცია „ჩვენი თავისუფლებისთვის“, რომლის ერთ-ერთმა ორგანიზატორმა ბექა წიქარიშვილმა ყვავილები მიიტანა „9 აპრილის“ მემორიალთან და ასე მიაგო პატივი 1989 წლის 9 აპრილს დაღუპული ადამიანების ხსოვნას. პარლამენტის წინ ასევე შეკრებილი არიან კონტრაქციის მონაწილეები, რომლებმაც უკმაყოფილება გამოთქვეს „9 აპრილის“ მემორიალზე აქციის მონაწილეთა ასვლისა და ცეკვის გამო და სცადეს ხელი შეეშალათ ბექა წიქარიშვილისათვის თაიგულით შეემკო „9 აპრილის“ მემორიალი. პარლამენტის წინ მობილიზებულია პოლიცია, რომელიც მხარეებს არ აძლევს ერთმანეთთან მიახლოების საშუალებას.