სომხეთის პრეზიდენტმა, არმენ სარქისიანმა ხელი მოაწერა ბრძანებას, რომლითაც ნიკოლ ფაშინიანი სომხეთის რესპუბლიკის პრემიერ-მინისტრად დაინიშნა. ამას წინ უძღოდა ფაშინიანის პრემიერ-მინისტრის პოსტზე პარლამენტის მიერ დამტკიცება. პრეზიდენტის ოფისი იუწყება, რომ არმენ სარქსიანსა და ფაშინიანს შორის შეხვედრა ოთხშაბათს პრეზიდენტის ოფისში გაიმართა. სომხეთის პრეზიდენტმა ფაშინიანს მიულოცა და უთხრა: "გისურვებთ რაც შეიძლება სწრაფად შექმნათ მთავრობა და ჩაერთოთ იმ პრობლემების გადაწყვეტაში, რომელთა წინაშეცაა ჩვენი სახელმწიფო, ხელისუფლება, მთელი ერი და ქვეყანა - სომხეთის რესპუბლიკა. გისურვებთ ყოველივე კარგს და წარმატებას". მთავრობის პრესსამსახურის ცნობით, ფაშინიანმა მოგვიანებით მიიღო ეროვნული უშიშროების სამსახურის დირექტორი, გეორგი კუტოიანი და მისი მოადგილეები. კუტოიანმა ფაშინიანს გააცნო უსაფრთხოების თვალსაზრისით არსებული ვითარება და ახლადარჩეული პრემიერი დაარწმუნა, რომ ეროვნული უშიშროების სამსახური კვლავაც "მაღალი პასუხისმგებლობით" აგრძელებს თავისი მოვალეობის შესრულებას. ცნობილი გახდა ასევე, რომ ფაშინიანი 9 მაისს გეგმავს ესტუმროს მთიან ყარაბაღს, სადაც მონაწილეობას მიიღებს ქალაქ შუშის დაკავების 26-ე წლისთავის აღნიშვნაში - რამაც თავის დროზე, 1990-იან წლებში მნიშვნელოვნად განსაზღვრა სომხურ-აზერბაიჯანული ომის ბედი. მედიის წინაშე გამოსვლისას, ფაშინიანმა ასევე თქვა, რომ გეგმავს სოჭში გამგზავრებას და მონაწილეობის მიღებას ევრაზიის ეკონომიკური კავშირის სამიტში, რომელსაც რუსეთი უხელმძღვანელებს და რომელიც 14 მაისს გაიმართება. ფაშინიანი ამბობს, რომ პირისპირაც შეხვდება რუსეთის პრეზიდენტს, ვლადიმირ პუტინს.