ერევანში გრძელდება საპროტესტო აქცია, დევზით „სომხეთი სერჟის გარეშე.“ გრძელდება დემონსტრანტების დაკავებაც. რადიო თავისუფლების სომხური სამსახური პოლიციის მონაცემებზე დაყრდნობით იუწყება, რომ 19 აპრილის დღის 2 საათისთვის დაკავებულია აქციის 100-მდე მონაწილე. დილით, პოლიციამ ძალა გამოიყენა სომხეთის მთავრობის შენობის მესამე კორპუსთან მიმდინარე საპროტესტო აქციის მონაწილეთა დასაშლელად და მათ ტერიტორია დაატოვებინა. დაშავდა რამდენიმე ადამიანი, მათ შორის ჟურნალისტი, საზოგადოებრივი ორგანიზაციის, „ინფორმირებულ მოქალაქეთა კავშირის“ წარმომადგენელი ტირაირ მურადიანი, რომელიც საავადმყოფოში გადაიყვანეს. მურადიანმა რადიო თავისუფლებას განუცხადა, რომ სამოქალაქო პირებად გადაცმულმა პოლიციელებმა სცემეს. ერევანში 13 აპრილიდან მიმდინარეობს საპროტესტო აქციები სომხეთის ყოფილი პრეზიდენტის, სერჟ სარგსიანის მმართველობის გახანგრძლივების წინააღმდეგ. ხალხმრავალი საპროტესტო გამოსვლების მიუხედავად, 17 აპრილს, სომხეთის პარლამენტმა ხმათა უმრავლესობით სარგსიანი აირჩია რესპუბლიკის პრემიერ-მინისტრად. კონსტიტუციაში 2015 წელს შეტანილი ცვლილებებით, სომხეთი საპრეზიდენტოდან საპარლამენტო მმართველობაზე გადავიდა და პრეზიდენტის ნაცვლად პრემიერ-მინისტრი გახდა ყველაზე დიდი ძალაუფლებით აღჭურვილი პირი.