პალესტინის ჯანმრთელობის დაცვის სამინისტროს ცნობით, სამი ადამიანი დაიღუპა და 365 დაშავდა 30 მარტს, ისრაელ სამხედროებთან შეტაკების დროს ისრაელ-ღაზის საზღვარზე. უწყება აცხადებს, რომ საპროტესტო აქციის მონაწილეთა ნაწილს აღენიშნებათ ჭრილობები მიყენებული საბრძოლო და რეზინის ტყვიებით, ნაწილი კი დაშავდა დიდი ოდენობით ცრემლსადენი გაზის ზემოქმედების შედეგად. პალესტინელები რამდენიმე კვირაა მართავენ საპროტესტო აქციებს ისრაელის საზღვართან და ითხოვენ დევნილების დაბრუნებას იმ ტეროტორიაზე, რომელიც ამჟამად ისრაელის სახელმწიფოს შემადგენლობაში შედის. საზღვრის გასწვრივ მობილიზებულია ისრაელის სამხედრო ნაწილები, რომლებიც საბრძოლო განგაშის რეჟიმში იმყოფებიან. საპროტესტო აქციები დაიწყო პალესტინის ისლამისტური დაჯგუფება „ჰამას“ მოწოდებით, რომელიც მართავს ღაზის სექტორს. გაერთიანებული ერების ორგანიზაციის მონაცემებით ღაზის 2 მილიონიანი მოსახლეობის ნახევარზე მეტი, 1,2 მილიონი ადამიანი ითვლება დევნილად ან ადგილნაცვალ პირად იმ მიწებიდან, რომლებსაც ისრაელი აკონტროლებს.