ფსიქიკური ჯანდაცვის პროფესიულმა თემმა პრემიერ-მინისტრ გიორგი კვირიკაშვილს და ჯანდაცვის მინისტრ დავით სერგეენკოს მიმართა. მიმართვაში ნათვამია, რომ მიუხედავად წლების მანძილზე გადადგმული პოზიტიური ნაბიჯებისა, ფსიქიატრიულ სფეროში არსებული მდგომარეობის გასაუმჯობესებლად ბევრად მეტი ძალისხმევაა საჭირო. „პირველ რიგში, პაციენტების ყოფითი და მათზე ზრუნვის პირობებია გამოსასწორებელი, თუმცა მსგავსი დაწესებულებების და თერაპიული პრაქტიკის არსებობა აღრმავებს სტიგმას როგორც ფსიქიკური აშლილობის მქონე პირების, ასევე, ფსიქიკურ ჯანდაცვაში მომუშავე სპეციალისტების და მთლიანად დარგის მიმართ“ - ნათქვამია განცხადებაში. „ალიანსი უკეთესი ფსიქიკური ჯანმრთელობისთვის“, „გლობალური ინიციატივა ფსიქიატრიაში-თბილისი“, „საქართველოს ფსიქიკური ჯანმრთელობის კოალიცია“, „საქართველოს ფსიქიკური ჯანმრთელობის ასოციაცია“, „ასოციაცია რეფორმა ფსიქიატრიაში“ მზადყოფნას აცხადებენ, მონაწილეობა მიიღონ და ჩაერთონ ზემოაღნიშნული პრობლემის მოგვარების პროცესში.
