Վենեսուելայի նախագահ Նիկոլաս Մադուրոն կարծում է, որ գործարար Իլոն Մասկը 2024 թվականի հուլիսի 28-ի նախագահական ընտրություններից հետո Վենեսուելայում հեղաշրջման փորձը ֆինանսավորելու համար ծախսել է առնվազն 1 միլիարդ դոլար։ Այս տեսակետը, ՏԱՍՍ-ի փոխանցմամբ, նա հայտնել է Venezolana de Television հեռուստաալիքի եթերում։
«Իլոն Մասկն առնվազն 1 միլիարդ դոլար է ներդրել պետական հեղաշրջման, ֆաշիստական ապստամբության, ընտրական գործընթացի դեմ բռնության համար», - ասել է Մադուրոն:
Նա մատնանշել է, որ «հուլիսի 28-ին կայացած նախագահական ընտրություններից հետո ծայրահեղ աջ ընդդիմությունը փորձել է բռնություններ սանձազերծել և ապակայունացնել իրավիճակը երկրում»։
«Հեղաշրջման փորձի հետևում Ամերիկայի Միացյալ Նահանգների կառավարությունն էր՝ հյուսիսամերիկյան կայսրության մշտական դավադրությունը», - նշել է Մադուրոն։
Նախագահը հայտնել է, որ «Մասկի միջոցները բաշխել է ընդդիմության առաջնորդներից մեկը՝ Մարիա Կորինա Մաչադոն, որը ֆինանսավորել է ահաբեկչական խմբավորումները»։
«Մասկը պարտություն կրեց», - ընդգծել է Մադուրոն և ընդգծել, որ «Վենեսուելայում տիրել են օրենքները, ճշմարտությունը, պետականությունը, կարգը և խաղաղությունը»:
Հուլիսի 28-ին Վենեսուելայում տեղի են ունեցել նախագահական ընտրություններ, որոնցում Մադուրոն հաղթել է ձայների 51,95%-ով։ Ընդդիմությունը հայտնել է, որ չի ընդունի իր պարտությունը ընտրություններում։ Հաջորդ օրը Վենեսուելայի մայրաքաղաքում և այլ քաղաքներում տեղի են ունեցել անկարգություններ, բախումներ ոստիկանների և զինվորականների հետ։ Մադուրոն ասել էր, որ «ԱՄՆ-ն ու Մասկը գլխավորում են Բոլիվարական Հանրապետությունում անհաջող հեղաշրջման փորձը»։
