Ենթադրում եմ, երբ վերադարձի մասին խոսվում է և վերադարձի իրավունքը մենք փոխկապակցում ենք ինքնորոշման իրավունքի հետ, հավանաբար, դա Փաշինյանի համար Հայաստանի պետական շահի դեմ գնացող արտահայտություն է:
Այս մասին Արցախի ներկայացուցչության առաջ լրագրողների հետ զրույցում ասաց Արցախի ՄԻՊ Գեղամ Ստեփանյանը՝ անդրադառնալով վարչապետ Նիկոլ Փաշինյանի հայտարարությանը, թե այն ընկալումները, որ կան արցախահայության շրջանակում վերադարձի առնչությամբ վնասում են Հայաստանի պետական շահին:
«Բայց դա ընդամենն իր ընկալումն է, սա նույն խոսույթի ու քաղաքականության շարունակությունն է, այսպես կոչված, նշաձողի իջեցման, որն էլ ի վերջո հանգեցրեց նրան, ինչն ունենք: Ես չեմ դադարելու խոսել վերադարձի իրավունքի մասին և չեմ դադարելու վերադարձի իրավունքը փոխկապակցել ինքնորոշման իրավունքի հետ», - ասաց նա:
Նրա խոսքով՝ այս պահին առաջնահերթություն պետք է լինի վերադարձի իրավունքն օրակարգ մտցնելը՝ հետագայում արդեն սեղանի շուրջ քննարկելու այն բոլոր հնարավորությունները, որոնք կարող են ժամանակի ընթացքում առաջանալ:
«Վերադարձի իրավունքն առանց ինքնորոշման իրավունքի ճանաչման կամ դրա հետ փոխկապակցման անհնար է, հակառակ պարագայում 5-6 օրվա ընթացքում չէինք ունենա դատարկված Արցախ», - շեշտեց նա:
