Այն ժամանակ, երբ բերքաբերցիներին ասում էինք, որ տեղի ունեցողը միայն իրենցը խնդիրը չէ, այլ համահայկական խնդիր է, լուրջ չէին ընդունում մեր ասածները: Այս մասին Գեղարքունիքի մարզ կատարած այցի ժամանակ լրագրողների հետ զրույցում ասաց Բագրատ Սրբազանը:
«Հիմա բերքաբերցիներն ո՞ւմ են դիմում, նեռի՞ն, ով կործանել է իրենց կյանքը, հիմա դիմում են նրան, որ ի՞նչ անի: Գնալու է, իր էությանը համապատասխան, փող է առաջարկելու, խաբելու է նորից ժողովրդին, ոմանք դարձյալ խաբվելու են: Ես հասկացել եմ, որ մարդիկ ունեն այդ ազատագրվելու տրամադրվածությունը: Հարցը այստեղ այն չափազանցված վախի մթնոլորտն է, որ մտցրել են յուրաքանչյուրի տուն։ Բոլորն են վկայում, որ ոչ մի ժամանակ մարդկանց այսպես վախեցնելու երևույթ չի եղել»,- ասաց նա:
Խոսելով սեպտեմբերին սպասվող քաղաքական գործընթացների մասին՝ Սրբազանն ասաց. «Սեպտեմբերի 7-ը, ամենայն հավանականությամբ, կտեղափոխվի սեպտեմբերի 4, որովհետև մարզահամերգային համալիրում մեծ դահլիճը, որ ցանկանում էինք վերցնել, ասացին, որ չի ստացվելու: Կհավաքենք մարդկանց ու կուղենշենք, թե որ ճանապարհով ենք գնալու: Ես ո՛չ ազատագրողն եմ, ո՛չ էլ փրկողը, ես էլ, ժողովուրդն էլ գործիք ենք թե՛ Աստծո, թե՛ մեր պատմության ձեռքին: Հազարապատիկ անգամ պետք է գնահատենք մեր ժողովրդին, որովհետև անկախ այն բոլոր հալածանքներից, որ ցուցաբերում է նեռը, մարդիկ չեն ընկրկում, մեր հաղթանակին էլ այլընտրանք չկա»:
