Այն բանից հետո, երբ Վենեսուելայի Կենտրոնական ընտրական հանձնաժողովը երկուշաբթի գիշերը գործող նախագահ Նիկոլաս Մադուրոյին հայտարարել է ընտրությունների հաղթող, հազարավոր ընդդիմադիրներ դուրս են եկել մայրաքաղաք Կարակասի և այլ քաղաքների փողոցներ՝ բողոքելու: Տեղի են ունեցել բախումներ ոստիկանների և զինվորականների հետ։
«Սկզբում նրանք հարվածում էին կաթսաներին ու թավաներին՝ ի նշան բողոքի, որ նախագահ Մադուրոն իրեն հաղթող է ճանաչել։ Հետո լարվածությունը սկսեց աճել», - հայտնել է BBC-ի թղթակիցը Կարակասից։
Հազարավոր ցուցարարներ ոտքով երթի են ելել, ոմանք՝ անցել են բազմաթիվ կիլոմետրեր, դեպի կենտրոն և նախագահական պալատ: Փողոցներում այրվել են մեքենաներ, անվադողեր, աղբ։ Բախումներ են տեղի ունեցել ցուցարարների և զինված ոստիկանների միջև։
Ոստիկանությունն ու զինվորականները փակել են նախագահականի շրջակայքի փողոցները և կիրառել ռետինե փամփուշտներ, արցունքաբեր գազ։ Ցուցարարները պատասխանել են` քարեր և դյուրավառ նյութեր նետելով: Ցուցարարները վանկարկել են «Ազատությո՛ւն» և «Այս կառավարությունը կընկնի՛» արտահայտությունները, պոկել և այրել Մադուրոյի՝ պատերից ու սյուներից կախված դիմանկարները։
Վենեսուելայի Ազգային ընտրական խորհրդի տվյալների համաձայն՝ գործող նախագահը հավաքել է ձայների 51,2%-ը, իսկ միասնական ընդդիմության թեկնածու Էդմունդո Գոնսալեսը՝ 44%-ը։ Սակայն անկախ էքզիթ փոլերը ցույց են տվել, որ Գոնսալեսի օգտին քվեարկել է ընտրողների մոտ 65%-ը, իսկ Մադուրոյի օգտին՝ 14%-31%-ը:
Ընդդիմության առաջնորդ Մարիա Կորինա Մաչադոն երկուշաբթի լրագրողներին ասել է, որ վերահաշվարկը, որն ընդդիմությունն անցկացնում է ինքնուրույն, ցույց է տալիս Գոնսալեսի ջախջախիչ հաղթանակը: Նրա խոսքով՝ Գոնսալեսը հավաքել է 6,27 միլիոն ձայն, իսկ Մադուրոն՝ ընդամենը 2,75 միլիոն։ Մաչադոն պարզաբանել է, որ ընդդիմությունը ընտրատեղամասերից ունի արձանագրությունների 73%-ի պատճենները։
Ինչպես նշում է AFP-ն, ընդդիմության առաջնորդները փողոցային բողոքի ակցիաների կոչ չեն արել. դրանք բռնկվել են ինքնաբուխ:
Նիկոլաս Մադուրոն երկուշաբթի մասնակցել է Ազգային ընտրական խորհրդի նիստին, որը հաստատել է նրա վերընտրությունը հաջորդ յոթ տարում։
Մի շարք երկրներ հրաժարվել են ճանաչել Մադուրոյի հաղթանակը. խոսքն առնվան Լատինական Ամերիկայի 12 երկրի մասին է: Նրանք պահանջել են անհապաղ գումարել Ամերիկյան պետությունների կազմակերպության մշտական խորհրդի նիստ: Մինչդեռ Վենեսուելան այդ երկրներից հետ է կանչել իր դիվանագետներին:
