«Մեդիալաբի» հարցերին պատասխանում է ՀՀ արտակարգ և լիազոր դեսպան, Արցախի ԱԳ նախկին նախարար Արման Մելիքյանը
– Պարո՛ն Մելիքյան, դուք և՞ս Եվրոպական միության արտաքին հարաբերությունների խորհրդի որոշումը՝ Հայաստանի հետ վիզաների ազատականացման երկխոսությունը մեկնարկելու, ինչպես նաև Հայաստանին Եվրոպական խաղաղության գործիքի ներքո աջակցություն տրամադրելու վերաբերյալ համարում եք պատմական, ինչպես ՀՀ արտգործնախարարն ու այլք։ Ինչո՞վ է այն պատմական։
– Նման թեմայով երկխոսության մեկնարկն առայժմ կարող ենք ուշագրավ համարել, բայց ոչ պատմական, գուցե պատմական կլինի կոչել դրա արդյունավետ ավարտը։ Այս պահին մեկնարկում է մի գործընթաց, որի արդյունքը երաշխավորված չէ և կախված է լինելու շատ տարբեր հանգամանքներից։ Մենք նաև պետք է նկատի ունենանք այս թեմայով երկխոսության տևողության գործոնը՝ բանակցությունները պետք է արդյունք տան խելամիտ ժամանակահատվածում և տևեն առավելագույնը մինչև այս տարվա վերջը։
Չեմ բացառում, որ հայկական կողմին կարող են առաջարկվել մի շարք տարաբնույթ նախապայմաններ, ու եթե այդպես լինի, ապա պաշտոնական Երևանը պետք է ուշադիր վերլուծի դրանց կատարման հնարավոր բացասական հետևանքները, համադրի դրանք ակնկալվող առավելությունների հետ, հատկապես եթե պահանջներ դրվեն ՀՀ ներքին օրենսդրական փոփոխություններ իրականացնելու վերաբերյալ։ Մի խոսքով՝ սկսվում է մի գործընթաց, որը քաղաքական ու իրավական որոշակի խութեր կարող է պարունակել։ Մեզ համար լավագույն արդյունքը կլինի այն, որ ՀՀ քաղաքացիների՝ ԵՄ մուտք գործելու ռեժիմը էապես դյուրացվի։
– Այս որոշումը ՀՀ-ԵՄ հարաբերություններում որակապես նոր մակարդակի մասի՞ն է խոսում։
– ԵՄ-ի կողմից այս որոշումը կարելի է դիտարկել որպես առաջիկայում Հայաստանի հետ հարաբերությունները նոր մակարդակի բարձրացնելու նախաձեռնություն։ Այդուհանդերձ, այդ նախաձեռնությունը պետք է կոնկրետ բովանդակություն ու ձև ստանա, միայն դրանից հետո հնարավոր կլինի ստույգ գնահատել ստացված արդյունքը, հարաբերությունների զարգացման հեռանկարը։ Միաժամանակ, անհրաժեշտ է ուշադիր հետևել ԵՄ-ում տեղի ունեցող զարգացումներին։
– Պարո՛ն Մելիքյան, վերջերս Նիկոլ Փաշինյանը հայտարարել էր, թե այնքան էլ վստահ չէ, որ ԵՄ-ն սպասում է Հայաստանին։ Ձեր տպավորությամբ՝ ԵՄ-ն իրականում սպասո՞ւմ է Հայաստանին։
– Եթե խոսքը Հայաստանի՝ ԵՄ-ին անդամակցությանն է վերաբերում, ապա չեմ կարծում, թե Բրյուսելում եվրապաշտոնյաներն անքուն գիշերներ են անցկացնում, աղոթելով, որ Հայաստանը վայրկյան առաջ ԵՄ անդամ դառնա։ Այդուհանդերձ, հավանաբար, այնտեղ սպասելիքներ կան Հայաստանի՝ դեպի ԵՄ քաղաքական շրջադարձի հետ կապված, և կա նաև պատրաստակամություն՝ նպաստելու այս հարցում Հայաստանի քայլերն ավելի վճռական դիրքորոշում որդեգրելուն։
– Կարծիքներ են հնչում, որ այս ամենը ԵՄ-ն ուղղակի չի անում, որ սրա դիմաց Հայաստանն ինչ-որ բան պետք է տա։ Համակարծի՞ք եք այս պնդումներին, եթե այո՝ ինչի՞ դիմաց է ԵՄ-ն այս ամենն անում։
– Մեր տարածաշրջանում, հավանաբար, մոտակա տարիներին կարևոր, ԵՄ արմատական շահերը շոշափող իրադարձություններ են ծավալվելու, և հանձին Հայաստանի օգտակար տարածաշրջանային գործընկեր ունենալը կարող է մեր եվրոպացի բարեկամների համար երկկողմ հարաբերությունները սերտացնելու հիմնավոր պատճառ լինել։
Քրիստինե Աղաբեկյան
MediaLab.am
The post Չեմ կարծում, թե Բրյուսելում եվրապաշտոնյաներն անքուն գիշերներ են անցկացնում, աղոթելով, որ Հայաստանը ԵՄ անդամ դառնա. Արման Մելիքյան first appeared on MediaLab Newsroom-Laboratory.
