Շվեյցարիան հրավեր է ուղարկել Վատիկան՝ մասնակցելու Ուկրաինայում խաղաղությանը նվիրված համաժողովին, որը կանցկացվի հունիսի կեսերին՝ առանց Ռուսաստանի մասնակցության։ Այս մասին Blick-ին տված հարցազրույցում ասել է Շվեյցարիայի դաշնային նախագահ Վիոլա Ամհերդը։
Շաբաթ օրը նա հանդիպել է Հռոմի պապ Ֆրանցիսկոսի հետ և, նրա խոսքով, քննարկված հարցերի թվում է եղել Ուկրաինայում պատերազմը։ Թերթի հարցին, թե արդյոք Պապը կմասնակցի Շվեյցարիայում կայանալիք խաղաղության համաժողովին, Ամհերդը պատասխանել է. «Վատիկանը շատ դրական է վերաբերվում խաղաղության համաժողովին»։
Ընդհանուր առմամբ, Շվեյցարիան հրավիրել է ավելի քան 160 երկրի և միջազգային կազմակերպության։ Ռուսաստանը հրավեր չի ստացել, սակայն Շվեյցարիայի իշխանություններն ասում են, որ խաղաղության հաստատման գործընթացում առաջընթացն անհնար է առանց Մոսկվայի մասնակցության, և համաժողովը պետք է քննարկի նաև բանակցություններում նրա ներգրավվածության հարցերը։
Ուկրաինայի ԱԳ նախարար Դմիտրի Կուլեբան ավելի վաղ հայտարարել էր, որ Շվեյցարիայում միջազգային համաժողովի նպատակը խաղաղ կարգավորման ընդհանուր մոտեցումներ ունեցող երկրների կոալիցիա ստեղծելն է։ Դրանից հետո, ըստ նրա, հնարավոր է Ռուսաստանին ներգրավել բանակցություններում։
Մոսկվան ավելի վաղ հայտարարել էր, որ չի մասնակցի Շվեյցարիայի հանդիպմանը, եթե նույնիսկ իրեն հրավիրեն: Ռուսաստանի արտգործնախարար Սերգեյ Լավրովը կիրակի կրկնել է, որ Ռուսաստանը պատրաստ չէ քննարկել ուկրաինական «խաղաղության բանաձևը», որի հիմնական կետերից մեկը ռուսական զորքերի դուրսբերումն է միջազգայնորեն ճանաչված Ուկրաինայի ողջ տարածքից։
