Բրյուսելում սպասվող հայ-ադրբեջանական հանդիպմանն ընդառաջ Հայաստան է ժամանել Եվրամիության հատուկ ներկայացուցիչը։ Երևանը նրա տարածաշրջանային այցի առաջին կանգառն է։
Տոյվո Կլաարը այսօր երեկոյան հանդիպելու է վարչապետ Փաշինյանին։ Մինչ այդ Անվտանգության խորհրդի քարտուղար Արմեն Գրիգորյանի հետ քննարկել է հայ-ադրբեջանական բանակցությունների բրյուսելյան պայմանավորվածությունների իրականացման ընթացքը:
Ըստ Անվտանգության խորհրդի գրասենյակի, Արցախի հիմնախնդրի կարգավորման հետ կապված հարցերից էլ են խոսել։ Բրյուսելում սպասվող հանդիպման մասին նախօրեին հայտարարել է Միացյալ նահանգների պետդեպարտամենտի խոսնակը՝ առանց մանրամասնելու, թե երբ է նախատեսված հանդիպումը, Հայաստանի կառավարությունից էլ փոխանցեցին, որ դեռ տեղեկություն չունեն։
Փաշինյանն ու Ալիևը վերջին անգամ հանդիպել են Մյունխենում անցած շաբաթ, ԱՄՆ պետքարտուղարի նախաձեռնությամբ։ Եռակողմ հանդիպումից հետո ակտիվացավ Բաքու - Արցախ երկխոսության միջազգային մեխանիզմ ստեղծելու թեման։
Սակայն Հայաստանի իշխանությունները չեն պարզաբանում, թե ինչպես են պատկերացնում այդ մեխանիզմը։ Արդյո՞ք երկխոսության այդ խողովակը երշախավորելու է, որ առանց Երևանի, Ստեփանակերտն ու Բաքուն կբանակցեն։ Անվտանգության խորհրդի քարտուղար Արմեն Գրիգորյանը շատ անորոշ է խոսում դրա մասին. - «Միջազգային տեսանելի մեխանիզմ պետք է ստեղծվի, որի շրջանակներում տեղի կունենա քննարկում Ստեփանակերտի և Բաքվի միջև իրավունքների և անվտանգության հարցերի շուրջ»։
Մյունխենում Փաշինյանի հետ քննարկման ժամանակ Ալիևն ասել էր, թե Արցախի պետնախարար Ռուբեն Վարդանյանին պաշտոնից ազատելուց հետո պատրաստ է խոսել Արցախի ժողովրդի հետ։ Իսկ ինչպե՞ս է դա լինելու, միջազգային երաշխիքո՞վ։ Անվտանգության խորհրդի քարտուղարը դժվարանում է ասել, քանի դեռ չի ուրվագծվել այդ միջազգային տեսանելի խողովակը։
Իսկ ի՞նչ երաշխիք, որ կգործի այդ միջազգային մեխանիզմը, և Բաքուն կխոսի ուղիղ Ստեփանակերտի հետ, Արցախը չի մնա Բաքվի քմահաճույքին։
Factor TV-ի հետ զրույցում Գրիգորյանն ասել է, որ երկրորդական է համարում հարցը, թե ինչպես է գործելու այդ մեխանիզմը, առաջնայինը, ըստ նրա, դրա ստեղծումն է. - «Այսինքն՝ միջազգային տեսանելի մեխանիզմ եթե ստեղծվում է, դա է առաջնահերթությունը։ Թե դա ինչպես է կատարվելու, դա արդեն երկրորդական հարց է»։
