Հայ-ադրբեջանական սահման ԵՄ մշտադիտարկման առաքելություն ուղարկելը կարող է խոչընդոտել Բաքվի և Երևանի միջև հարաբերությունների կարգավորման գործընթացին, ուրբաթ հայտարարել է Ադրբեջանի խորհրդարանի խոսնակ Սահիբա Գաֆարովան, գրում է ՌԻԱ «Նովոստի»-ն:
«Եվրոպայից դիտորդների առաքելություն ուղարկելը հայ-ադրբեջանական սահման կարող է խանգարել հարաբերությունների կարգավորման գործընթացին (Բաքվի և Երևանի միջև - Խմբ.): Հայաստանում Ադրբեջանի հետ սահմանին Եվրամիության դիտորդական առաքելության տեղակայման վերաբերյալ իմ դիրքորոշումը հայտնել եմ Ռուսաստանում հանդիպումների ժամանակ»,- ասել է Գաֆարովան խորհրդարանի նիստում։
Հունվարի 23-ին կայացած հանդիպման ժամանակ ԵՄ ԱԳ նախարարները հավանություն են տվել Հայաստանում քաղաքացիական առաքելության ստեղծմանը, որը կնպաստի սահմանային գոտիներում կայունացմանը, վստահության ամրապնդմանը և Հայաստանի և Ադրբեջանի միջև հարաբերությունների կարգավորմանը: Ակնկալվում է, որ առաքելության մանդատը կլինի երկու տարի, նրա օպերատիվ շտաբը կգտնվի Հայաստանում։