ԱԺ-ում լրագրողների հետ ճեպազրույցի ընթացքում Ալեն Սիմոնյանը անդրադարձել է Ռուսաստանի ԱԳ նախարար Սերգեյ Լավրովի և Արարատ Միրզոյանի հանդիպման ընթացքում ՀԱՊԿ-ի գործունեությանն ու հայ-ռուսական փոխօգնության պայմանագրին, մասնավորապես այն հարցին, որ Լավրովը հայտնել է, թե ՀՀ-ն որպես ՀԱՊԿ նախագահող երկիր կարող է խորհուրդ հրավիրել, ինչը ավելի արդյունավետ կլինի իր սահմաններին ստեղծված իրավիճակը քննարկելու համար։
«Գործընթացները շարունակվում են, մեր վրա կրակում են, մեր տղաները մահանում են։ Մենք ընդամնեը 1 օր հետո դիմել ենք և մինչև օրս որևիցե ռեալ արձագանք չի եղել։ Ենթադրենք նրա ասածը ինչ-որ տեղ իրականության մեջ տեղ ունի, այդ դեպքում ո՞ւր է մեր պատասխանը՝ հայ-ռուսական պայմանագրին համապատասխան, դա էլ հո նախագահության հետ կապված խնդիր չէ։ Մենք նաև հայ-ռուսական փոխօգնության պայմանագրով ենք դիմել մեր ռուսաստանցի գործընկերներին, բա դրա հետ կապված ինչո՞ւ է լռություն»,- ասել է Սիմոնյանը։
Նա ասաց, որ այս մասով մոսկովյան հանդիպման ժամանակ պարզաբանում է պահանջել։
«Մինչև այս պահը կա այն, ինչը դուք հրապարակայնորեն լսում եք և տեսնում ենք, մենք շարունակելու ենք պահանջել։ Միևնույն ժամանակ ուզում եմ նորից ասել, որ մեր երկրի անվտանգությունը պահպանելու հարցում մենք չենք սահմանափակվելու միայն այս պահին եղած լծակները օգտագործելով, որովհետև կարող է մեկ-երկու ժամվա տարբերությամբ տարածաշրջանում կտրուկ բաներ փոխվեն և մենք այդ հնարավոույթյունը չունենանք»,- նշեց ԱԺ նախագահը։
Սիմոնյանը ասաց, որ Հայաստանը ՀԱՊԿ-ից ավելի կտրուկ գործողությունների է սպասում։
«Մենք մտավախություն ունենք, որ ՀԱՊԿ-ը կարող է լքել տարածաշրջանը, արդյոք այդ մտավախությունը ճիշտ է, թե ոչ։ Երբ այստեղ ասում են՝ Հայաստանը թող դուրս գա ՀԱՊԿ-ից և այլն, հասկանանք, իսկ կարո՞ղ է ՀԱՊԿ-ն է դուրս եկել տարածաշրջանից, մեզ չեն ասում, որ տրամադրություններս չգցենք»,- ասաց Ալեն Սիմոնյանը։