Կարիբյան ճգնաժամը հաջողությամբ լուծելու պրակտիկան այժմ պետք է ակտիվորեն ուսումնասիրվի Արևմուտքի հակառուսական գործողությունների ֆոնին, ասել է ՌԴ Անվտանգության խորհրդի քարտուղարի տեղակալ Ալեքսանդր Վենեդիկտովը, գրում է ՌԻԱ «Նովոստի»-ն։
«Կարիբյան ճգնաժամը հաջողությամբ լուծելու փորձը, ինչպես նաև ամերիկա-խորհրդային առճակատման մի շարք այլ ոչ պակաս վտանգավոր դրվագներ, պետք է հատկապես ակտիվորեն ուսումնասիրվեն հիմա, երբ հավաքական Արևմուտքը՝ Վաշինգտոնի գլխավորությամբ, պաշտոնապես նոր «սառը պատերազմ» է հայտարարել ընդդեմ Ռուսաստանի»,- ասել է Վենեդիկտովը ուրբաթ Կուբայի հրթիռային ճգնաժամի 60-ամյակին նվիրված համաժողովում։
Կարիբյան ճգնաժամն արտահայտում է 1960-ական թվականների սկզբին Խորհրդային Միության և ԱՄՆ–ի միջև չափազանց գերլարված քաղաքական, դիվանագիտական և ռազմական առճակատումը. ճգնաժամը կարող էր հանգեցնել գլոբալ միջուկային պատերազմի։ Ճգնաժամը հարուցվեց 1961 թվականին՝ Միացյալ Նահանգների կողմից Թուրքիայում (ՆԱՏՕ-ի անդամ երկիր) միջին հեռահարության «Յուպիտեր» հրթիռների տեղակայման արդյունքում, որոնք ի զորու էին խոցելու Խորհրդային Միության արևմտյան շրջանների քաղաքները, ներառյալ Մոսկվան և ԽՍՀՄ գլխավոր արդյունաբերական կենտրոնները։ Որպես պատասխան քայլ Խորհրդային Միությունը ԱՄՆ-ի ափերին սերտ հարևանությամբ գտնվող Կուբա կղզում տեղակայեց իր ռազմական անձնակազմն ու ստորաբաժանումները, որոնք զինված էին ոչ միայն սովորական, այլ նաև ատոմային զենքով, ներառյալ հողահեն բալիստիկ և տակտիկական հրթիռները։
