Հայտնաբերվել է ԱՄՆ-ի Ֆլորիդա նահանգի Սերֆսայդ քաղաքում փլված 12-հարկանի բնակելի շենքի փլուզման հետևանքով զոհվածներից վերջինի դին, հայտնում է BBC լրատվականը և հավելում, որ հայտնաբերվածը 54-ամյա Էսթել Հեդայն է։
54-ամյա կնոջ դին հայտնաբերելու արդյունքում զոհերի թիվը հասել է 98-ի, հակառակ որ սկզբնական շրջանում անհայտ կորած էր համարվում 159 մարդ, որոնց թիվը ոստիկանությունն ավելի ուշ նվազեցրել էր։
Շենքի փլուզման պատճառն առայժմ անհայտ է, սակայն, ինչպես հայտնի է, 2018 թվականին հրապարակված զեկույցի համաձայն՝ շենքն անվտանգային խնդիրներ է ունեցել։
Ինչպես ավելի վաղ տեղեկացրել էր Tert.am-ը, շենքի փլատակների տակ որոնողափրկարարական և վերականգնման աշխատանքները դադարեցվել են։
Հիշեցնենք, որ հուլիսի 7-ին շենքի փլատակների տակ որոնողափրկարարական աշխատանքներին մասնակցող ջոկատները փրկարարական առաքելությունից անցել էին վերականգնման աշխատանքներին։ Որոնողափրկարարական աշխատանքներն ընթանում էին 12 ժամը մեկ հերթափոխով՝ Իսրայելից և Մեքսիկայից օգնության մեկնած անձնակազմերի աջակցությամբ։ Աշխատանքները մի քանի անգամ ընդհատվել են՝ այդ թվում նաև «Էլզա» արևադարձային փոթորկի պատճառով։
Աշխատանքների ավարտից հետո հրշեջ ծառայության պետ Ալան Քոմինսկին ասել է․ «Սա իսկապես դժվար էր վարչության համար։ Ես չեմ կարող չհպարտանալ տղամարդկանց և կանանց համար, որոնք ներկայացնում են Մայամի Դեյդ շրջանի հրշեջ փրկարար ծառայությունը»։
Հիշեցնենք նաև, որ հունիսի 25-ին ԱՄՆ-ի Ֆլորիդա նահանգի Սերֆսայդ քաղաքում 12 հարկանի շենք էր փլուզվել։ Շենքը բաղկացած է եղել 136 բնակարանից, որոնցից 55-ը փլվել են։ Այն կանգուն է 1980 թվականից և կառուցվել է չորացված ջրային տարածքի վրա, ինչը, մասնագետների կարծիքով, մտահոգիչ է։ Առայժմ հայտնի է 12 զոհի և 149 անհայտ կորածի մասին։ Այս առնչության գործ է հարուցվել, ընթանում է հետաքննություն։ Ավելի վաղ հրապարակված 2018 թվականի ինժեներական զեկույցի համաձայն՝ 12-հարկանի ծովափնյա Champlain Towers-ի նախնական նախագծում «լուրջ սխալ» է եղել, որը փոչընդոտել է ջրի արտահոսքին շենքի հիմքից։
