Ծրագրային մարտական վարժանքների շրջանակում ռուս խաղաղապահները վարժանք են անցկացրել Լեռնային Ղարաբաղի Մարտակերտի շրջանի Սրխավենդ գյուղում` ուղղված հնարավոր խախտումների վերացմանը և դիտակետի անվտանգության ապահովմանը: Այս մասին գրում է ՌԴ ՊՆ պաշտոնական կայքը:
Ուսումնական կետերում վարժանքների ժամանակ խաղաղապահ զորակազմի սպաները զինծառայողներին հստակ ցույց են տվել նոր մարտավարական գործողություններ՝ տեղանքը լքելիս, սարքավորումներ բեռնելիս, հստակ վայրում տարբեր թաքստոցային միջոցներով մանևրելիս, ինչպես նաև պայմանական հակառակորդին արգելափակելիս:
Ուսումնական կետերից մեկում ստորաբաժանման հրամանատարներին ցույց են տրվել զինծառայողների` խախտումներ թույլ չտալու և դիրքի վրա հնարավոր հարձակումը կանխելու օպերատիվ գործողությունները, իմիտացիոն միջոցների շնորհիվ:
«6 մարզավայրում և դրանցից յուրաքնչյուրում կան կետեր: Սկզբունքորեն, ընդգրկվում է Լեռնային Ղարաբաղի դիտակետերում անձնակազմի կողմից իրականացվող խնդիրների ամբողջ սպեկտրը: Զենքեր ձեռք բերելուց մինչև սնունդ պատրաստելը և անձնակազմի տեղակայումը: Այս դասընթացի վերջին փուլը անձնակազմի օպերատիվ գործողությունների, մարտական պատրաստվածության պահպանման խնդիրների վերաբերյալ համապարփակ վարժանքն է»,-ասել է Մարտակերտի շրջանի դիտակետում ռուս խաղաղապահների հետ դասընթացի ղեկավար Եվգենի Ստեպանովը:
Ռուսաստանի խաղաղապահ առաքելության զինծառայողները շարունակում են իրականացնել իրենց պատասխանատվության գոտում հրադադարի ռեժիմի պահպանումը վերահսկելու, ինչպես նաև Լաչինի միջանցքի երկայնքով տրանսպորտային միջոցների, սննդամթերքի և տարբեր ապրանքների տեղափոխման անվտանգությունը պահպանելու իրենց խնդիրները:
Լուսանկարները կարող եք դիտել այստեղ:
Հիշեցնենք, որ նոյեմբերի 9-ին Ռուսաստանի, Հայաստանի և Ադրբեջանի ղեկավարները Լեռնային Ղարաբաղում ռուս խաղաղապահների տեղակայման շուրջ պայմանավորվածություն են ձեռք բերել, ստորագրվել է հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը` բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։
