Բելգիայի հարավում ջրհեղեղների հետևանքով զոհերի թիվը հասել է 11-ի, հայտնում է RTBF հեռուստաալիքը:
«Իշխանությունները հաստատել են 11 մարդու մահը, երեք փրկարար, որոնց նավակը շրջվել է ցեխային հոսքի մեջ, անհայտ կորած են համարվում», - ասված է նյութում:
Ջրհեղեղների պատճառ են դարձել հորդառատ անձրևները, որոնք հանգեցրել են միանգամից մի քանի գետերում ջրի մակարդակի բարձրացմանը: Լիմբուրգում մեկ օրում տեղացել է 130 մմ տեղում, Լիեժ նահանգում՝ 150 մմ:
Տեսանյութը կարող եք դիտել այստեղ:
Իշխանությունները հայտնում են, որ ներկա դրությամբ Բելգիայի հարավային մասում գտնվող քաղաքների փողոցներում ջրի մակարդակը հասնում է 50-60 սմ-ի, որոշ տեղերում՝ մեկ մետրի: Տարերքը ոչնչացրել է ավելի քան 20 տուն:
Հորդառատ անձրևների առաջացրած ջրհեղեղների հետևանքով Գերմանիայում էլ՝ Արվայլեր շրջանում, մոտ 1300 մարդ անհայտ կորած է համարվում, հայտնում է korrespondent.net-ը՝ շրջանի վարչակազմի կայքին հղումով:
Ավելի վաղ Գերմանիայի իշխանությունները հայտնել էին, որ ջրհեղեղների ժամանակ Գերմանիայի արևմտյան մասում մահացել է առնվազն 70 մարդ, իսկ անհայտ կորածների որոնման աշխատանքներում ներգրավված են արտակարգ ծառայությունների ուժերը, ինչպես նաև զինվորականներն ու իրավապահները:
Ար գետում և դրա վտակներում որոնողափրկարարական աշխատանքները շարունակվում են, փրկարարական աշխատանքներ են տարվում նաև Հյուսիսային Հռենոս-Վեսթֆալիա և Բադեն-Վյուրթեմբերգ երկրամասերում:
Տեսանյութը կարող եք դիտել այստեղ:
Գերմանիայի կանցլեր Անգելա Մերկելը, իր հերթին, հայտարարել է, որ ջրհեղեղների հետ կապված թվերն իր մոտ շոկ են առաջացրել:
Նշենք, որ Գերմանիայում հորդառատ անձրևներ են արդեն մի քանի օր:
