Անհրաժեշտություն է առաջացել արագ քննարկելու ընտրական հանցագործություններին առնչվող օրենքի նախագիծը, իսկ դրա համար մենք ունենք 24 ժամվա ռեժիմ, անհրաժեշտություն կար, ըստ իս, դեռևս 2018 թվականին հրապարակում ժողովրդին խոստացված, կամ հենց ժողովրդի կողմից հռչակված բարեփոխումներն իրականացնելու, որոնց համար իշխանությունն ուներ 3 տարի ժամանակ: Այս մասին այսօր ԱԺ արտահերթ նիստի ժամանակ ասաց «Բարգավաճ Հայաստան» խմբակցության անդամ Տիգրան Ուրիխանյանը՝ անդրադառնալով ընտրական գործընթացներին վերաբերող օրենքի նախագծերի փաթեթին:
«Մինչ օրս մենք չենք հասել նրան, որ կարգավորվեն արդարության տրամաբանությունից բխող բազմաթիվ հարցեր, որոնք, օրինակ, գործող իշխանությունը նախապատրաստել էր մի նախագծով, որը մինչ օրս չի ներկայացվել ԱԺ, թեպետ ես գտնում եմ, որ դրա համար կար ժամանակ: Ընտրությունները արդար են, ազատ են, թափանցիկ են, որակյալ այն դեպքում, երբ փող չունեցող, բայց լավ գաղափար ու ծրագիր ունեցող մարդիկ, կամ քաղաքական ուժեր կարողանում են մասնակցել դրանց»,- ասաց Ուրիխանյանը:
Պատգամավորը նաև նշեց՝ գումար չունեցող թեկնածուները պետք է վստահ լինեն, որ ընտրատեղամասերում որևէ մեկը ընտրախցիկում չի նկարելու քվեաթերթիկը, որպեսզի հետո վճարված գումարի կամ պարտադրանքի դիմաց ապացուցի՝ ում է ընտրել:
Նշենք, որ այս ընտրական հանցագործությունների վերաբերյալ օրենսդրական այս փաթեթով քրեականացվում են մի քանի կետեր, օրինակ՝ ընտրատեղամասում բռնություն գործադրելը կամ դրա սպառնալիքը, աշխատողին (պետական կամ մասնավոր) պարտադրելը, որ մասնակցի որևէ հանրահավաքի, ինչպես նաև հանրահավաքին մասնակցելու համար փող տալը և այլն:
«Յուրաքանչյուր մասնակիցս ընտրություններին նախ և առաջ բոլոր ջանքերը, ուշադրությունը, ռեսուրսները մեկտեղենք, որպեսզի վերահսկենք քվեարկության գործընթացներն ու հաշվարկի գործընթացը, ոչ թե մտածենք՝ ինչպես կազմակերպել որակյալ քարոզարշավ»,- նշեց պատգամավորը։
