Չեխիայի նախագահ Միլոշ Զեմանը հայտարարել է, որ Վրբետիցայում պայթյունների պատճառների երկու վարկած կա՝ պահեստի աշխատակիցների կողմից զինամթերքի հետ անզգույշ վարվելը և օտարերկրյա հատուկ ծառայությունների գործակալների գործողությունները: Այս մասին գրում է «ՌԻԱ Նովոստի» գործակալությունը:
«Վրբետիցայում պայթյունի պատճառների 2 վարկած կա. առաջինը պահեստի աշխատակիցների կողմից նրանց ոչ պրոֆեսիոնալ վերաբերմունքն է, երկրորդը՝ արտասահմանյան հատուկ ծառայությունների գործակալների գործողությունները»,- ասել է Զեմանը:
Հիշեցնենք, որ ապրիլի 17-ին Չեխիայի ԱԳ նախարարի պաշտոնակատար Յան Գամաչեկը հայտարարել էր ՌԴ դեսպանության 18 աշխատակցի արտաքսելու որոշման մասին, որոնք, նրա խոսքով, ՌԴ Արտաքին հետախուզության ծառայության և Գլխավոր հետախուզական վարչության սպաներ են և առնչություն են ունեցել Վրբետիցա գյուղի զինամթերքի պահեստում 2014 թվականին տեղի ունեցած պայթյունին: Դիվանագետներին 48 ժամ էր տրվել երկրից հեռանալու համար
ՌԴ ԱԳՆ-ն ի պատասխան բողոքի նոտա է հղել Պրահային ռուս դիվանագետներին արտաքսելու որոշման պատճառով, այնուհետև Չեխիայի դեսպանին կանչել են ԱԳՆ:
