Հյուսիսային Կորեայի Աշխատանքային կուսակցության Կենտրոնական կոմիտեի վարչության առաջին տեղակալ Կիմ Յո Չժոնը, որը երկրի ղեկավար Կիմ Չեն Ընի կրտսեր քույրն է, Հարավային Կորեայի առաջնորդ Մուն Չժե Ինին «լկտի և ցինիկ ամերիկյան թութակ» է անվանել, գրում է France 24-ը՝ հավելելով, որ ԿԺԴՀ-ի առաջնորդի քույրը նման հայտարարությամբ հանդես է եկել ի պատասխան երկրի կողմից հրթիռային արձակման վերաբերյալ Հարավային Կորեայի քննադատությունների։
Կիմ Յո Չժոնը հայտարարել է, որ «ի զորու չէ զսպել մարտի 26-ին Հարավային Կորեայի նախագահ Մուն Չժե Ինի հայտարարությունների վերաբերյալ զարմանքը»։
Հարավային Կորեայի նախագահը, մասնավորապես, դատապարտել էր Հյուսիսային Կորեայի կողմից բալիստիկ հրթիռների արձակումը՝ հայտարարելով, որ դրանք «բարդացնում են իրավիճակը», սակայն նշել էր, որ Հս․ Կորեան, Հրվ. Կորեան և ԱՄՆ-ն պետք է փորձեն շարունակել երկխոսությունը, ինչպես նաև երկրի քաղաքացիներին հավաստիացրել էր, որ երկիրը կպաշտպանի «ցանկացած սադրանքներից»։
«Սա, իրոք, լկտիության գագաթնակետն է», - հայտարարել է Կիմ Յո Չժոնը՝ հիշեցնելով, որ 2020 թվականի հուլիսի 23-ին Մուն Չժե Ինն այցելել է Հարավային Կորեայի պաշտպանական զարգացման գործակալություն և գովաբանել տարբեր սպառազինությունների մշակումը, ինչպես նաև խոսել է «Կորեական թերակղզում խաղաղության ապահովման համար բավարար հեռահարությամբ բալիստիկ հրթիռի մշակման մասին»։
ԿԺԴՀ-ի առաջնորդի քույրը հարավկորեացի նախագահին «ամերիկյան թութակ» է անվանել՝ հայտարարելով, որ վերջինս «նույնիսկ հակասում է ինքն իրեն»:
Նրա խոսքով՝ նման «անտրամաբանական և լկտի պահվածքը նման է ԱՄՆ-ի ավազակային գործողություններին, որոնք կշտամբում են ԿԺԴՀ-ին՝ ինքնապաշտպանության միջոցառումներն անվանելով ՄԱԿ-ի բանաձևերի խախտում և սպառնալիք միջազգային հանրությանը»։
Հյուսիսային Կորեան անցած շաբաթ հայտարարել էր, որ «նոր տիպի մարտավարական հրթիռներ» է արձակել:
Բալիստիկ հրթիռների արձակումից հետո ԱՄՆ նախագահ Ջո Բայդենն ասել էր, որ Միացյալ Նահանգները համարժեք պատասխան կտա։ ԱՄՆ-ն, Ճապոնիան և Հարավային Կորեան դատապարտել էին փորձարկումը։
Նշենք, որ ՄԱԿ-ի Անվտանգության խորհրդի բանաձևերի համաձայն՝ Փհենյանին արգելվում է բալիստիկ հրթիռներ փորձարկել:
