ԱՄՆ-ն և Միացյալ Թագավորությունը պատժամիջոցներ են կիրառել Մյանմարի զինված ուժերի կողմից վերահսկվող կոնգլոմերատների նկատմամբ՝ փետրվարի 1-ին գեներալների կողմից իրականացված ռազմական հեղաշրջման ֆոնին, ինչը Վաշինգտոնը որակել է որպես «գարշելի բռնության և չարաշահումների» պատասխան։
Այս մասին հայտնում է արաբական Al Jazeera լրատվական գործակալությունը։
ԱՄՆ-ի ֆինանսների նախարարությունը հայտարարել է, որ պատժամիջոցներ են սահմանվել Myanma Economic Holdings Public Company Ltd (MEHL) և Myanmar Economic Corporation Ltd (MEC) ընկերությունների նկատմամբ: Մեծ Բրիտանիան, իր հերթին, պատժամիջոցներ է կիրառել MEHL ընկերության նկատմամբ՝ մուսուլմանների նկատմամբ մարդու իրավունքների լուրջ խախտումների առթիվ։
ԱՄՆ-ի պետքարտուղար Էնթոնի Բլինկենն ասել է, որ Միացյալ Նահանգները և Մեծ Բրտանիան ցույց են տվել, որ հետևողական են լինելու՝ զզվելի բռնությունների և այլ չարաշահումների համար պատասխանատվության ենթարկելու իրենց տված խոստումներին։
Ըստ Global Witness կազմակերպության սա կարևոր քայլ է ռազմական ռեժիմի ֆինանսավորման հիմնական աղբյուրները կտրելու համար։ Human Rights Watch-ն, իր հերթին, նշել է, որ կոնգլոմերատների նկատմամբ սահմանված պատժամիջոցները զգալի դժվարություններ կստեղծեն ընկերությունների համար՝ դրսում գործող ընկերությունների հետ աշխատելու հարցում: Սակայն, ըստ Human Rights Watch-ի Ասիայի շահերի պաշտպանության հարցերով տնօրեն Ջոն Սիֆթոնի, հակառակ վերոնշյալ քայլի կարևորությանը՝ սա ամենահզոր տնտեսական պատժամիջոցը չէ, որը կարող էր կիրառվել։
Ինչպես նշել էր Tert.am-ը, ավելի վաղ Միացյալ Նահանգների նախագահ Ջո Բայդենը հաստատել էր Մյանմարի ռազմական հեղաշրջման առաջնորդների նկատմամբ պատժամիջոցներ կիրառելու վերաբերյալ գործադիր մարմնի որոշումը։
Բայդենը նշել էր, որ Միացյալ Նահանգները մտադիր էր դեպի Մյանմար արտահանման ուժեղ վերահսկողություն սահմանել, ինչպես նաև սառեցնել ԱՄՆ-ի այն ակտիվները, որոնք օգուտ են տալիս Մյանմարին՝ միևնույն ժամանակ պահպանելով աջակցությունը առողջապահության ոլորտին, քաղաքացիական խմբերին, Մյանմարի բնակիչներին ուղղակի օգուտ տվող այլ ոլորտներին:
Հիշեցնենք, որ Մյանմարում տեղի է ունեցել ռազմական հեղաշրջում, որի ընթացքում զինվորականները ձերբակալել են «Ազգային լիգա հանուն ժողովրդավարության» կուսակցության ղեկավար և պետական խորհրդական Աուն Սան Սու Չժիին, նախագահ Վին Մյինային և այլ բարձրաստիճան պաշտոնյաների: Զինվորական հեռուստատեսությունը հաղորդել էր երկրում մեկ տարի ժամկետով արտակարգ դրություն հայտարարելու մասին: Պետական հեղաշրջման արդյունքում պետական իշխանությունը երկրում անցել է Մյանմարի զինված ուժերի գլխավոր հրամանատար Մին Աունգ Խլայնուի ձեռքը, իսկ նախագահի պաշտոնակատար է դարձել փոխնախագահ Մյինգ Շվեն:
