Ռուսաստանի դեմ պատժամիջոցային ճնշման ուժեղացումը «շանսեր չի ավելացնում» Մոսկվայի և Վաշինգտոնի միջև երկխոսության կարգավորման գործընթացի համար: Այս մասին հայտարարել է ՌԴ փոխարտգործնախարար Սերգեյ Ռյաբկովը, գրում է «ՌԻԱ Նովոստի» գործակալությունը:
«Բայց ռուս-ամերիկյան հարաբերությունների հետագա վատթարացման պատասխանատվությունն, ամեն դեպքում, ամբողջովին կրում է Միացյալ Նահանգները: Դրանում կասկած լինել չի կարող»,- ասել է փոխարտգործնախարարը գործակալության հետ զրույցում:
Նախօրեին ԱՄՆ ազգային հետախուզության տնօրենի գրասենյակը գաղտնազերծել էր մի զեկույց, որում Մոսկվան մեղադրվում էր Դոնալդ Թրամփի վերընտրվելուն նպաստելու, Բայդենին վարկաբեկելու և ամերիկյան հասարակությունում «տարաձայնություններ սերմանելու» համար: Փաստաթղթում նշվում է Ռուսաստանի դեմ նոր պատժամիջոցների ներդրման մասին:
Մեկնաբանելով նոր սահմանափակումներ մտցնելու հնարավորությունը՝ Ռյաբկովը նախկինում նշել էր, որ Մոսկվան «հանգիստ» է վերաբերվում դրան. նման միջոցառումներ արդեն ներդրվել են ավելի քան 90 անգամ: Կրեմլը զեկույցն անվանել է «անհիմն ու անապացուցելի»: Ինչպես ընդգծել է ՌԴ նախագահի մամուլի քարտուղար Դմիտրի Պեսկովը, Ռուսաստանը ոչ մի կապ չունի ընտրություններում թեկնածուների դեմ արշավների հետ: Ըստ նրա, նման «անորակ» նյութերն օգտագործվում են որպես նոր պատժամիջոցների պատրվակ:
Բացի այդ, չորեքշաբթի ԱՄՆ առևտրի նախարարությունն ընդլայնել է Ռուսաստանի դեմ արտահանման սահմանափակումները. այն ներառվել է երկրների ցուցակում, որոնց հետ զենքի արտահանումն ու ներմուծումը ամբողջովին արգելված է: