Գլխադասային հանձնաժողովի ներկայացուցիչները քննարկումների արդյունքում կողմ քվեարկեցին լրտեսության և պետական դավաճանության համար ցմահ ազատազրկում սահմանելու նախագծի օգտին: Սրանք առավել մեծ վտանգ պարունակող հանցանքներ են մեր պետության և ժողովրդի համար։ ՀՀ իրավակարգավորումները հաշվի առնելով հանդերձ՝ որոշվեց ամենախիստ պատիժները սահմանել այս երկու արարքների համար: Այս մասին լրագրողների հետ ճեպազրույցի ժամանակ ասաց ԱԺ փոխնախագահ Վահե Էնֆիաջյանը:
Հարցին, թե այս դեպքում ինչ է նախատեսվում միջազգային կազմակերպությունների պարագայում, Էնֆիաջյանը պատասխանեց. «Պետք է հաշվի առնենք՝ ինչ ժամանակահատվածում է հանցանքը եղել և օրենքը ընդունելուց հետո ինչ նոր հանգամանքներ ի հայտ կգան արդեն գործող օրենքի մասով։ Լիահույս ենք, որ այս օրենքի գիտակցությունը բոլորի մոտ պետք է լինի, այդ թվում՝ միջազգային կազմակերպությունների, անկախ նրանից՝ ով ինչ պաշտոն է զբաղեցնում»:
Էնֆիաջյանը անդրադարձավ նաև Գագիկ Ծառուկյան-Նիկոլ Փաշինյան հանդիպման մանրամասներին՝ նշելով, որ հանդիպման ժամանակահատվածի և օրակարգի հստակեցման դեպքում բոլորը կտեղեկացվեն այդ մասին:
«Մեր դիրքորոշումը չի փոխվել: ԲՀԿ-ն գտնում է, որ ստեղծված իրավիճակից դուրս գալու միակ ճանապարհը արտահերթ խորհրդարանական ընտրություններն են»:
Էնֆիաջյանը հրաժարվեց մենաբանել «Լուսավոր Հայաստան» խմբակցության ղեկավար Էդմոն Մարուքյանի այն հայտարարությանը, որ իշխանությունները առաջարկում են ընտրությունների գնալ իրենց առաջարկած ընտրական օրենսգրքով:
Հարցին, թե ԲՀԿ-ի համար էակա՞ն է՝ հին, թե նոր ընտրական օրենսգրքով կգնան խորհրդարանական ընտրությունների, Էնֆիաջյանը պատասխանեց.
«ԲՀԿ-ի համար էական է, որ գերակա լինի ժողովրդի կամընտրությունը: Ընտրական օրենսգիրքը այն իրավական փաստաթուղթն է, որի մասով պետք է ունենանք կոնսենսուս։ ԲՀԿ-ի համար ընդունելի են համապետական ցուցակներով ընտրությունները, բայց սա մի գործընթաց է, որ մեկ կամ երկու քաղաքական ուժերի մասով չպետք է որոշվի։ Այս առումով պետք է ներդաշնակություն լինի խորհրդարանական և արտախորհրդարանական ուժերի մասով:
Էնֆիաջյանը նշեց, որ ԲՀԿ-ն քաղաքական իրավիճակի հանգուցալուծման մեկ ելք է տեսնում՝ Նիկոլ Փաշինյանի հրաժարական և արտահերթ խորհրդարանական ընտրություններ։