Մարդու իրավունքների պաշտպանին ճնշում են, և դա նեղ իշխանական քմահաճույք է: Այս մասին Tert.am-ի հետ զրույցում ասաց Մարդու իրավունքների նախկին պաշտպան Լարիսա Ալավերդյանը՝ ՄԻՊ գրասենյակի ֆինանսավորման կրճատման հնարավորության վերաբերյալ կառավարության որոշման մասին:
«Մարդու իրավունքների պաշտպանին ճնշում են, որովհետև, ըստ երևույթին, ՄԻՊ-ը, պատասխանատվությունը և լիազորությունները չչարաշահելով, անդրադառնում է մարդու իրավունքների մասսայական ոտնահարումներին, որոնք տեղի են ունենում Ադրբեջանում, բայց իշխանությունները, պատկան մարմինները ընդհանրապես դրա մասին չեն արտահայտվում»,- ասաց Լարիսա Ալավերդյանը:
Նշենք, որ մարտի 11-ին Կառավարության հերթական նիստին ընդունված որոշմամբ առաջարկվում է ուժը կորցրած ճանաչել «Մարդու իրավունքների պաշտպանի մասին» սահմանադրական օրենքի 8-րդ հոդվածի 5-րդ մասը։ Ըստ որի՝ յուրաքանչյուր տարի Պաշտպանի և նրա աշխատակազմի, ինչպես նաև Պաշտպանի՝ որպես կանխարգելման ազգային մեխանիզմի ֆինանսավորման համար պետական բյուջեով նախատեսված հատկացման չափը չի կարող պակաս լինել նախորդ տարվա պետական բյուջեով նախատեսված հատկացման չափից: Ստացվում է, որ այս որոշմամբ Մարդու իրավունքների պաշտպանի գրասենյակին տրամադրվող տարեկան ֆինանսավորումը կարող է նվազել՝ տարբեր հիմնավորումներով։
Մարդու իրավունքների նախկին պաշտպանը նշեց, որ կառավարության այս որոշումները կրում են նեղ անձնական բնույթ, և սա քմահաճույք է, իսկ պատգամավորները ոչ ճիշտ կերպով են արտահայտվում Մարդու իրավունքների պաշտպանի հասցեին, գործող իշխանությունն էլ իր հերթին խրախուսում է դա:
«Ես կարծում եմ՝ քաղաքականությունը, որը վարում է իշխանությունը, չի համապատասխանում ՄԻՊ-ի սկզբունքներին, իսկ Մարդու իրավունքների պաշտպանը ճիշտ տեղում է հայտնվում և ամեն անգամ դրա մասին խոսում է: Տարվա ընթացքում մենք տեսել ենք՝ ինչպիսի գռեհիկ բառապաշարային հարձակումներ են եղել մարդու իրավունքների պաշտպանի հասցեին, և դա եղել է պատգամավորների կողմից, իսկ ղեկավարության կողմից եղել են խրախուսող հայտարարություններ: Դա քաղաքական քայլ չէ, նեղ իշխանական քմահաճույքներից բխող ճնշում է»,- մեկնաբանեց նա:
Լարիսա Ալավերդյանը նաև նշեց՝ վստահ է, որ Արման Թաթոյանը չի դադարեցնելու իր գործառույթները:
«Մարդու իրավունքների պաշտպանը կշարունակի իր գործունեությունը, պարզապես այն աշխատանքը, որը պետք է իրենք անեն, կպահանջի իրենցից գերլարվածություն, և վստահ եմ՝ Արման Թաթոյանը չի հրաժարվի իր որևէ գործառույթից»,- ասաց Լարիսա Ալավերդյանը:
