Ադրբեջանի զինված ուժերի օպերատիվ-մարտավարական զորավարժությունները, որոնք իրականացվելու են մարտի 15-18-ը, կանոնավոր բնույթ են կրում և կայունության և անվտանգության համար վտանգներ չեն ստեղծում տարածաշրջանում: Այս մասին ամենշաբաթյա ճեպազրույցի ժամանակ ասել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով առաջիկայում սպասվող ադրբեջանական զորքերի ուսումնավարժանքները:
«Սովորաբար զորավարժություններ իրականացնում են Հարավային Կովկասի բոլոր երկրները: Դա արվում է կանոնավոր սկզբունքով, համապատասխան տեղեկությունը ժամանակին տրամադրվում է հետաքրքրված կողմերին: Մեր ունեցած տեղեկություններով՝ վերոնշյալ զորավարժությունները, ինչպես արդեն նշեցի, կանոնավոր բնույթ են կրում և ուղղված են զորքերի մարտունակության բարձրացմանը»,-հավելել է դիվանագետը՝ պատասխանելով համապատասխան հարցին:
Զախարովան անդրադարձել է նաև Լեռնային Ղարաբաղում Հայրենական մեծ պատերազմի հերոսներին նվիրված հուշակոթողների նկատմամբ վանդալիզմի դրսևորումներին:
«Անթույլատրելի և անբարոյական ենք համարում Հայրենական մեծ պատերազմի տարիներին նացիզմի դեմ հերոսական պայքար մղած անձանց հիշատակի նկատմամբ ցանկացած ոտնձգություն»,- ասել է Զախարովան՝ հույս հայտնելով ադրբեջանական իշխանությունները կձեռնարկեն անհրաժեշտ քայլերը իրավիճակը շտկելու համար: